【娛樂人物】年廿八洗邋遢 為女兒求姻緣 
薛家燕渴望迎孫接福

更新時間 (HKT): 2021.02.09 02:00

農曆新年習俗繁多,今日年廿八洗邋遢,大忙人薛家燕日前帶齊清潔消毒裝備到辦公室大掃除,雞毛掃不離手化身姐姐,一清衰氣,年三十晚則會與家人聚首家中吃團年飯。家燕姐牛年展望升呢做嫲嫲,又想女兒石祐珊遇上真命天子,渴望雙喜臨門過牛年。

撰文:黃曉妍

攝影:仇志德

薛家燕雖然是基督徒,但農曆新年會按照傳統在家中貼揮春及擺放水仙、蘭花和大吉,不過就拒絕桃花,家燕姐笑說:「唔會,因為我爺爺、我爸爸,一路落嚟都話我哋姓薛唔擺得桃花,所以我一直都冇擺桃花。」今年因疫情關係,家燕姐會享受家庭樂過年,親手炮製蓮藕章魚豬𦟌愛心湯給家人品嚐,寓意路路暢通,事事順利。

不考慮退休

農曆新年前夕,家燕姐仍未收爐,她響應年廿八洗邋遢習俗,除了將家中一年舊衣捐贈及處理外,亦做足準備自攜抹布、水盆、噴霧器、膠手套和雞毛掃,全副裝備返到新城電台清理自己辦公桌面,當拎起雞毛掃,家燕姐不禁勾起童年回憶,她笑說:「我哋嗰個年代就用雞毛掃,第一可以掃塵,第二邊個曳曳就打落去,嗰陣時我都好曳,所以俾我爸爸罰過好多次,之後見到雞毛掃就有啲驚。」

家燕姐一直想抱孫,兒子石耀庭2018年結婚娶妻至今仍未有好消息,不過玄學家李居明批家燕姐今年有機會做嫲嫲?她說:「話我今年會紅鸞星動,可能係話我屋企人有喜事,我都希望大女珊珊快啲搵個伴,亦希望係個仔同新抱有喜事。」

家燕姐想願望成真,但若真的抱孫亦不考慮退休,她說:「我好鍾意小朋友,我都有諗過(抱孫),三個仔女都有自己嘅工作,但如果我唔做嘢,我會好唔舒服,我鍾意講嘢、唱歌、扮靚,呢啲係我愛好,我呢生人最開心係自己嘅愛好成為事業,仲可以賺錢,所以我會揀嘢做,唔會退休。」此外,家燕姐近日推出自家品牌曲奇餅賀年全盒,內附有其肖像的財神爺利是,祝願大家牛轉乾坤。

失百萬進賬

全球受疫情困擾,香港娛樂圈幾近癱瘓,平時百忙難抽空的家燕姐去年也失去內地、星馬、美加登台搵錢機會,和眾多藝人一樣影響收入,損失近七位數字進賬:「好彩本身都會積穀防饑,都有飯食,食少啲當減肥囉,我覺得人要樂觀,積極面對,人生一定有高高低低,尤其呢個疫情係冇辦法預料,希望大家群策群力,疫情快啲過去,經濟安穩。」

【視像解相思之苦】

薛家燕早年認與年輕10多年的港商男友相戀,二人均把這段遠距離戀愛低調處理,儘管家燕姐經常甜蜜掛在嘴邊,但外界從未見過家燕姐男友真身,去年情人節因男友在內地隔離,兩人未能相聚,港商男友在上海砌了「Nancy baby」雪堆表心意,一招雪中送暖打動家燕姐。

今年情人節適逢是大年初三,家燕姐與港商男友仍然分隔兩地,只能透過通訊解相思之苦,她笑說:「應該視像,因為最近內地嘅疫情又緊張咗,所以佢嚟香港要隔離,返去又要隔離,希望疫情快啲過去,不過情人節嗰日唔見都OK,年初三赤口,或者我寄盒曲奇畀佢囉,等佢有個驚喜,可以同屋企人一齊食。」

娛聞樂陪你走遍全球追星,即Like「娛果」FB 專頁!
BannerBanner