陳潔玲網店因HKTVmall系統出錯「被停業」 損失五位數營業額:我接受唔到

更新時間 (HKT): 2021.02.10 16:14

前無綫藝人陳潔玲(Christy)於2017年離開大台,開始與朋友合資創業,不過早前她卻被鍾舒漫(Sherman)追討44,286元退股款項,而Sherman更透過律師入稟小額錢債審裁處處理追討款項及訟費,案件將安排於今年3月13日審查文件及排期審訊。陳潔玲與Sherman的錢銀轇轕未解決,不過她就投訴王維基創辦的HKTVmall,指其網店無故被停業一星期,令她損失了5位數營業額。

陳潔玲今日在facebook中出post,反問HKTVmall為何整唔見貨唔賠貨錢之餘,更要罰錢?除此之外,她又指對方亦無故將她的網店變為「non-business day」,令她的網店被停業一星期,雖然她有向HKTVmall方面尋求解決方法後亦未能解決問題。「出錯就要修正和解決,但係點解同你哋兩個CS傾足成日,結果都解決唔到問題?其實每個月拆商家咁多commission,但係出錯率咁高,你哋好意思嗎?」而她亦指因對方犯錯,搞砸了她新年檔期的銷售部署,而她最後留言更嘲「多謝晒,王維基先生」。與陳潔玲同是苦主的網民,看完她的post後紛紛留言,有人表示HKTVmall的合約條款話改就改,又有人話給了10萬還要俾錢「買廣告位」等,亦有很多網民直接tag了王維基的FB賬號。

系統出錯「被停業」約一星期

對於在網上鬧爆HKTVmall,陳潔玲回覆《蘋果》時表示自己在HKTVmall賣精品及嬰兒用品網店「girlboss」因系統問題被對方無故顯示為「休息」,要等到初五才能營業:「正常嚟講CS(HKTVmall)要send email問長假期會唔會開門,然後俾份表我哋去填,因系統今次出問題,好多商戶都收唔到email,就算連好大嘅商戶都冇收到,咁個系統就會自動當我哋初一至四都唔開門,但如果你初一至初四都唔開,個系統就會自動將你間舖閂咗。」陳潔玲指由於問題對商戶毫無保障,故她覺得HKTVmall方面要正視這個問題:「佢嘅嘅平台有好多唔同嘅商戶都遇過呢啲問題,呢啲出錯亦都唔係一次,已經好多次。我唔可以因為網店畀佢閂咗一星期而叫我啲員工唔好返工,我都係要照出糧、照交租。其實好簡單,既然係系統出錯,我而家同你反映返件事,可唔可以幫我哋開返間舖呢?但佢哋話唔得、做唔到囉,公司系統個程序係咁囉。」

生意冇咗仲要被罰錢

陳潔玲表示因系統問題令她損失了5位數的營業額,造成非常大的損失:「因為新年檔期又叠住情人節,對網上嚟講係一個好黃金嘅檔期,唉~」除了這問題外,她又指當收貨員收了貨物後,無論在運送途中「唔見咗」又或是令貨物損壞,HKTVmall不會負責之餘,更會被罰錢,令她要負擔三重損失:「首先我哋損失一單生意,第二我哋唔見咗嗰件貨就好似石沈大海咁唔知去咗邊,搵唔返,而佢哋亦唔會賠貨錢俾我哋之餘,佢哋個機制係如果你有任何一個order取消,佢哋每單要罰我哋$100。」她指當自己舖頭出貨後,HKTVmall的工作人員也會簽收作實,而簽收後的貨物在哪裏或是出現任何狀況,已不是她能控制:「交咗俾佢嘅同事但最後件貨唔見咗嘅話,點解個責任會轉嫁喺我哋小商戶度?有同佢哋CS反映但永遠都係問唔到答案,對我嚟講好簡單,冇咗單生意,算喇!但最少貨錢要賠返俾我,同埋點解你仲要罰我錢?呢個好荒謬!」

雖然面對種種不合理,但陳潔玲指因為合約問題以及其平台流量不俗,故仍會繼續選用,但她亦希望對方真的能正視所有問題:「出錯唔緊要,但出錯要修正同要解決件事,但呢個錯(系統問題)我接受唔到,造成咗咁多商戶唔方便,佢哋可唔可以優化返個系統?所以我覺得好有需要反映返出嚟!如果我哋有呢個損失,佢哋有冇諗過點樣合理嘅補償或彌補返我哋小商戶嘅損失。」

王維基facebook親自回覆

在陳潔玲出post約8小時後,終於在facebook中召喚了王維基真身回覆,他留言指HKTVmall由去年12月開始,已先後發過5次電郵及2次「商戶管理系統」的訊息來讓商戶通知HKTVmall有關公眾假期的營運安排,而且更列明日期及內容。至於對陳潔玲所指的「三重損失」,王維基指翻查紀錄發現因該店「違反《不良廣告(醫藥)條例》的罰款」,以及有客人收到貨物後發現「寄錯貨」及「俾少貨」而致被罰款。

其後陳潔玲再回應指王維基的資料屬實:「根據佢睇返嘅系統,佢講啲嘢係正確,但係而家嘅問題出現咗,我哋商戶喺收到12月啲email,但係一月份就收唔到嗰嗰關於2021年嗰啲非工作日安排嘅email,不論係email,甚至係HKTVMALL後台嘅MMS系統都收唔到呢啲訊息。」至於罰款問題,陳潔玲就謂王維基只根據紀錄直述,但其實當中有一項罰款出問題:「當然嗰件事(罰款)就唔係好似系統咁講,係有個客人直接同我反映,佢喺HKTVmall度買咗我嘅產品,然後收唔到貨,但係我嘅同事就check返,明明係出咗貨,呢個可能係個系統,或者公司架構上,而造成溝通上嘅誤會,我今次出呢個post,只係想反映返件事,希望佢哋嗰邊可以有人跟進。」她續說:「之前同佢哋CS溝通咗成日,都解決唔到我嘅問題,問佢哋嘅嘢,亦都俾唔到確實嘅答案,但係我都覺得OK,王生而家出嚟解釋返件事,佢喺FB都有PM我,話會跟進,我相信係好事,可能係溝通或操作上出現咗啲誤會,希望大家可以正視咗件事,解決咗就OK。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner