朱千雪上麥玲玲節目談馭夫術 唔介意另一半「去滾」最緊要識耍冧

更新時間 (HKT): 2021.02.10 16:03
(電視截圖)

幸福人妻朱千雪和岑杏賢,日前聯同兩位「2Line黨」好姊妹湯洛雯和蔣家旻,齊齊上麥玲玲和阿Bob林盛斌的新節目,大談點先「嫁得好」。玲玲師傅就話若然要在圈中大紅大紫,女藝人通常好難嫁得好,因為如果好紅就一定有傷官星,而傷官星亦包含了剋夫星,所以女藝人通常只能在家庭和事業二擇其一。而4女的命盤,則以蔣家旻最適合食娛樂圈飯。

被玲玲師傅講中的朱千雪,當年正值上位,卻選擇急流勇退讀書嫁人。愛情至上的她,在節目中大談和醫生老公的婚姻生活,指二人現正享受過二人世界。她更大讚老公溫柔體貼,兩公婆相處融洽。當阿Bob問她老公是否靚仔時,她甜絲絲說:「我覺得靚仔咪得囉!」而此時湯洛雯踢爆朱千雪看似理智但對愛情卻十分執着,甚至帶點死纏爛打義無反顧。對另一半的容忍度更是令人驚嘆,湯洛雯說:「佢會話另一半去滾,我唔知咪算!」朱千雪不但冇否認,甚至話:「佢道歉就可以㗎喇,除非佢唔鍾意我。」另一方面,朱千雪又自覺入行8年冇人追求,此時湯洛雯又爆她根本不肯畀電話異性,有事只用email聯絡,當然冇異性敢追求。

而經常被人追問何時和筍盤馬國明結婚的湯洛雯,一聽「結婚」兩字就話感到厭倦,她笑言:「問題係我女仔嚟㗎嘛,人哋都未求婚,我點講啫,但如果佢求,我一定講。」她指和馬明屬一凹一凸性格。她說:「我鍾意講嘢,佢就會話:『你鍾意啦』、『幾好吖』、『無所謂啦』、『激死我』咁囉。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner