邱禮濤指政府懶理電影業意料中事 《拆彈2》收13億人仔票房依然淡然:老闆滿意就OK

更新時間 (HKT): 2021.02.11 00:30

武漢肺炎襲港逾一年,重創香港娛樂圈,香港戲院自去年11月底停院,至下星期年初七才重開,歷時兩個半月有多。原定去年底上映的《拆彈專家2》,由邱禮濤執導、劉德華、劉青雲主演。受停院影響要到下星期才可上映。此片已先後在台灣及大陸公映,單是大陸票房截至昨日已超過13億人民幣,目前仍在放映。

《拆彈2》導演邱禮濤早前在葵涌接受訪問時,對13億人仔票房成績顯得淡然:「我諗老闆滿意就OK,夠我拍下一部戲我就開心,應該夠嘅。」邱禮濤當時半開玩笑,《拆彈2》「最大吉利是係唔知幾多年後電視會播」才可以睇到。

無論電影業及戲院業,都有一種聲音政府冷待,邱禮濤坦言:「都有眼睇到,係預期之中,等於搵個道具手足同我做件嘢,佢能力有幾多,估到做出嚟會點樣。」邱禮濤未敢估計業界何時才能復蘇:「唔去做就實瓜,做又唔一定翻生。」雖然擔心香港電影業前景,但仍要向前行:「唔好畀呢樣嘢蓋過其他嘢,香港電影工業有問題,唔理咩原因先,90年代已經開始,到而家廿幾年啦。」期待行業快復蘇,因為身邊很多電影班底都停下來,他慶幸仍有電影計劃在手,不過也因疫情受阻。

對上一套《拆彈1》有場爆破紅隧場面,今次爆破頻率更高,當中牽涉更多香港地標。女主角倪妮雖然缺乏打戲經驗,但有運動底子,很快上手。邱禮濤和華仔合作無間,相反與青雲從沒有合作,邱禮濤解釋:「一直都有搵青雲,但種種原因唔成事,今次組合好有火花。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner