黃夏蕙「牛魔王」look踩黃大仙祈福 艾美琦鐵扇公主上身護航

更新時間 (HKT): 2021.02.12 17:22

每逢農曆新年香港善信均依傳統習俗,到黃大仙祠霸定位搶上頭炷香,可惜今年因在疫情和限聚令下一反傳統,凌晨上頭炷香改為閉門直播進行,今日入祠者必須進行登記,但仍無阻善信祈福。

擅於打扮12生肖的黃夏蕙每年必搶閘走到廟前上香,今年無奈只能參與直播節目。今日大連初一夏蕙姨化身「牛魔王」出動,由兩契女艾美琦和李紫彤充當鐵扇公主護航到黃大仙上香祈福,神氣打扮吸引路人合照儲閃咭。配合牛年大年初一,夏蕙姨不惜工本花費3萬元打造服飾踩場:「專登訂造,我鍾意完美,對牛角幾靚,今日多咗兩位契女做鐵扇公主,係我背後嘅女人。」夏蕙姨此舉亦兌現網民承諾,皆因早前網民紛紛表態,指儲夏蕙姨生肖閃咭獨欠牛:「唔想大家失望,個個話冇咗隻牛,所以幾個月前已經安排。」

夏蕙姨望疫情快走

今年夏蕙姨未能踏入子夜一刻入祠上頭炷香,雖有感到失望,但亦無奈接受:「都冇辦法,惟有今日嚟,祈求世界和平,疫情快走,人人身體健康有財富,快啲通關,黃大仙都咁辛苦,年三十我哋都嚟唔到,但牛係好勤力同勇敢,所以今年會冇事。」艾美琦和李紫彤化身鐵扇公主,除了為契媽護航擋開人群外,亦寓意撥走肺炎疫情。面對人群眾多,艾美琦說:「都慣咗,入祠時會張開雙手,好似打排球咁。」艾美琦和李紫彤份屬好友,近日成為同們姊妹,簽下同一經理人,李紫彤有意向歌手發展,而曾跟Aily曾組隊成立AD2的艾美琦,因最終反目收場,故無意再同姊妹組隊,免傷和氣。

夏蕙姨昨夜應邀到港台特備節目《講東講西 我上頭炷香》,和主持人鄧達智分享年三十晚過年傳統,夏蕙姨指每年除夕晚,在祠內聽到鑼鼓響一刻就衝前插香,習慣身邊人群擠擁,並說:「最初冇特別打扮自己,但係啲香就燒燶頭髮,又畀人扯甩髮,仲推到趴咗喺地上,雙眼煙到流眼淚,後來就包頭包面。有年生肖屬狗,就整頂狗仔帽,點知小朋友睇得好開心,之後就每年花心思去裝扮。」鄧達智稱讚夏蕙姨是香港新年ICON,無人能及。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner