吳佩孚建議崔碧珈戀熟男

更新時間 (HKT): 2021.02.12 02:00
■吳佩孚為崔碧珈所寫幾隻字測字,指她感情上先凶而後吉。

《蘋果》請來玄學家吳佩孚為現年32歲、肖龍的崔碧珈預測牛年運程,吳師傅指她八字不錯,不過「好易愛上唔係咁好嘅男人」,將來會婚姻美滿,遲婚較好,或揀選年長過她約10年、甚至是離過婚的男士,吳師傅謂:「有機會係異地情,另一半出身好,富二代,做生意有父蔭,冇條件嘅男仔同你冇結果。」

吳師傅指崔碧珈在玄學方面有天份,靈感直覺較強,而她即舉了例子:「好多年前喺餐廳見過黃柏高(Paco),但當時大家唔識,當年我喺外國讀緊碩士最後一年,忽然有次沖涼途中出現影像見到有spotlight射住我,跟住我即刻同爹哋講要返香港選港姐,點知返到嚟突然見到Paco公司廣告,我唔知係佢嘅公司,傳咗份CV去,對方覆叫我去面試,一見就係Paco!」最後崔碧珈分別寫上「崔」、「人」及「香」來測自己在工作、感情及香港運勢,吳師傅稱:「崔有山,即工作有阻礙,但後來路通,下面係一個佳字,即先凶後吉。至於人字問感情,呢個字代表兩個人行埋一齊,有拖拍,但發展就後話。最後香字,上面禾字即有得食,形勢唔錯,但你寫到上下有啲分離,上官下民,即雙方仲未和氣。」

娛聞樂陪你走遍全球追星,即Like「娛果」FB 專頁!
BannerBanner