MIRROR四子 金牛報喜

更新時間 (HKT): 2021.02.12 02:00

踏入牛年新正頭,《蘋果》祝大家萬事如意,金牛遍地,牛氣沖天。年初一《蘋果》找來人氣組合MIRROR的其中四子,為新一年整湯圓及寫揮春,整湯圓用上特別餡料,寫揮春又將自己的名字寫進其中,實行開心搞笑跟大家迎牛年!

組合MIRROR成員姜濤、柳應廷(Jer)、盧瀚霆(Anson Lo)及呂爵安(Edan)年初一首次處男整湯圓,有別於傳統的芝麻、花生湯圓餡料,以朱古力豆、肚臍餅、熊仔軟糖、麥提莎和激酸檸檬糖為食材。四子一見餡料興奮大叫,Anson Lo和Edan更趁冇人為意,偷食朱古力。之後各人取了一嚿麵粉製作湯圓,其中Edan放了麥提莎,Anson Lo則放了四粒超酸檸檬糖,阿Jer見狀大叫:「喂呀,落咁多檸檬糖陣間點食呀!啲湯圓一咬落去就咬到啲糖!牙都爛呀!」Anson Lo竟說自己唔食就得。

姜濤製毛湯圓 三子喊驚

姜濤搓了一輪麵粉,忽然露出邪惡笑容:「咦,呢度有條毛呀!陣間整畀你哋試!」三子即厭惡大叫:「嘩,好核突呀,你認住自己嗰粒,我哋唔會食呀!」眾人其後將湯圓刻上記號,但求自己不會中伏。最離譜是Anson Lo把餡料朱古力豆黐上湯圓表面,結果一放入水即染到成煲變泥水色,四子見到嗌晒反胃。

等待湯圓煮熟期間,四子用毛筆寫揮春送給《蘋果》讀者,並有心思地將各人的名字寫進揮春內,盧瀚霆寫上「瀚如雨下」、呂爵安寫「呂敗呂試」、姜濤寫「大展RED濤」、柳應廷則寫「得心應手」,各顯創意。至湯圓煮熟後,阿Jer以權威口吻說:「我決定有一個人要食,就係呂爵安,因為佢啱啱放咗好多朱古力喺外面,搞到啲湯變成咁。」雖然阿Jer認錯Anson Lo為Edan,但Edan仍硬着頭皮去試,結果竟連說兩次:「其實味道唔錯!」其他三子慫恿他吃掉所有湯圓,坐在旁邊監場的黃慧君(花姐)卻開口說:「應該你哋自己每人食一粒,唔係點會好睇?」結果花姐下旨,四子當然要聽話自食其「圓」。

手機用戶請按此放大圖表

娛聞樂陪你走遍全球追星,即Like「娛果」FB 專頁!
BannerBanner