曾志偉與死敵余詠珊同場零交流 馮盈盈封$100出手豪過汪阿姐

更新時間 (HKT): 2021.02.12 17:49

大年初一,67歲的曾志偉首次以TVB副總經理兼行政委員會特別顧問身份,出席無綫賀年節目,跟一眾行政人員團拜。席間一眾高層排排企,志偉站在行政總裁李寶安身旁,另一邊是曾勵珍、樂易玲和屢傳不和的余詠珊,志偉跟好友樂易玲密密斟,反而與余詠珊零交流,明顯仍有芥蒂。

馮盈盈豪派$100利是

汪明荃擔任司儀外,還穿「紅絲」騷腿壓軸獻唱《歡樂年年》,風騷坐在觀眾席上的謝東閔身旁,又向主席許濤拜年說:「許先生,祝你生意興隆,加少少人工。」全場爆笑起哄。胡楓(修哥)繼續化身財神爺派$20開工利是,志偉90度鞠躬接利是,而志偉亦有準備利是給現場藝人、工作人員及傳媒朋友,每封$100;去年撈到風生水起、跟地產才俊曹展康傳緋聞的馮盈盈亦派「紅底」$100,出手比起派$50的阿姐汪明荃還要闊綽。而謝東閔、龔嘉欣、陳庭欣、高海寧、蔡思貝、何遠東、江嘉敏就派$50,蝦頭楊詩敏、港姐冠軍謝嘉怡、鄧佩儀、黃建東和劉佩玥則派$20,人人開心過新年。

曾志偉避談余詠珊

西裝骨骨的志偉自言是「新丁」直言仍未習慣做高層,過去十幾廿年都是出埠登台賺錢,而今早更睇錯返工時間,又忘記帶鎖匙,結果「摸門釘」。他說:「可能太緊張啦,我係新丁,摸門釘就去咗茶水房,原來人人都飲唔同嘅茶,以後茶水房歸我,大家要喺開心嘅環境工作。」他盼望未來無綫與香港人同步,要「進步、團結、開心」。問到何麗全是否回巢幫TVB跟四大唱片和談,志偉未有否認,只說「遲啲講」;再被追問余詠珊會否離職?他續說:「大家預告囉,今日唔講公事,返工再講,我返嚟三日,畀啲時間我,未習慣坐寫字樓,要定時要定候返工,幾十人開會等我,我次次都最早,希望大家都係團結大家,上上下下一齊製作好節目去進步。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner