膠戰男神Jeffrey靚仔有本心! 絕佳男友唔畀癡女埋身

更新時間 (HKT): 2021.02.13 22:29

今年赤口撞正西方情人節,《蘋果》早前請來ViuTV節目《膠戰》的「癡女」黃正宜(阿正)及「男神」魏浚笙(Jeffrey)扮演一日情侶應節,在九龍灣上演一幕「癡女約男神共度情人節」,劇情中阿正除了陪玩陪唱之外,還為Jeffrey斟茶、揼骨,誓要做滿分女朋友,結果她的搞笑功夫成功𠱁得男神十分開心。

談到最難忘情人節,Jeffrey指必定是跟女友Evelyn的首個情人節:「唔知點解嗰時會買99支玫瑰,買唔尷尬,反而由中環一直攞住,但當時覺得幾威,因大紮過其他人。」阿正則是自己一個去挑戰食情人節餐:「而家電台節目源頭就係咁,有年本身唔想情人節冇嘢做,約咗結他老師上堂,點知最後一分鐘老師『放飛機』,我即開咗個page,再去某大型連鎖傢俬店一個人食情人節餐做直播。」若安排情人節節目𠱁另一半開心,Jeffrey會帶女友到離島親親大自然,阿正則自彈自唱莫文蔚的《慢慢喜歡你》送給另一半。

會否想有男神如Jeffrey做男友?阿正笑謂:「拍節目時傾過,男仔意見係女友靚覺得好威,但女仔一般都唔接受,冇安全感。鏡頭前我成日黐住佢,但真實中我唔想有(男神男友),太有負擔,企佢隔籬好大反差。」

Jeffrey自言第一感覺才是最重要,心目中女友沒有特定條件,他謂:「唔係要威,我唔係嗰啲人,長期對住相處先係最重要,唔會齋睇外表。」有否曾被女仔主動追求?Jeffrey聲稱沒有:「如覺得合眼緣一定係我追,如果大家都有感覺,邊個先追求都冇所謂。」問到有多少幾次拍拖經驗,他只肯透露是數次。女生覺得「靚仔冇安全感」,Jeffery就用誠意拆招:「為尊重女方,我唔會單獨同異性出街,你都唔想另一半咁做,你自己又點解咁做?調返轉咁諗,我介意女朋友同異性去街。」現女友兼任Jeffrey經理人、化妝師、助手,如何報答女友支持?他竟坦言未有仔細考慮過,會否送禮物?Jeffrey謂:「送畀佢不如畀佢揀,鍾意邊樣就揀邊樣。」

Jeffrey被形容為新一代男神,但有此稱號會否有壓力;即如一出街便一定要以靚仔樣示人?他說:「我唔覺自己係,咁係對工作嘅尊重,要保持最好狀態,唔會有唔得狀態。」若不是工作會否打扮隨便?他只說:「呢啲唔係叫貪靚,係對工作尊重,我長期喺去咗水腫嘅狀態,唔係齋姿整,而係內裏都要排水,排水工程每日開工前都要做,即飲咖啡。」

Jeffrey說話語氣跟「元祖級」男神」黎明十分相似,果然有做男神的條件 。會否覺得姜濤及ANSONBEAN也是新一代男神?他謙虛地說:「佢哋全部外貌都好好,內在又好夠料,一出嚟唱歌都好好,好欣賞。我心中嘅男神係吳彥祖、金城武、The Rock同林宥嘉。」

在《膠戰》中阿正不時癡戀Jeffrey,她亦指相信大部份女仔第一眼見到對方定必被他外表所吸引,雖然阿正指Jeffrey這樣的男仔的確很難給予她安全感,但她亦大讚對方除了外表,性格很好,體貼兼有紳士風度。

在幕前演出阿正以大笑姑婆、癡女等形象示人,但她坦言亦想給另一面給觀眾看:「我私下係好認真嘅人,但見到男藝人咁靚仔又真係按捺不住,所以都好矛盾。」阿正的「爆牙」絕對是她的標記,不過她亦曾考慮箍牙:「但我怕箍完個樣唔同咗,同埋爆牙係屋企傳統,全家人都有,諗住失散咗都用隻牙去搵返大家,所以都未箍住。」 阿正亦認同「爆牙」樣子比較孩子氣,她笑謂:「或者有一日突然自己覺要變大個,想發展多元化就要箍。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner