Gin Lee望疫情退散冀2022再踏紅館 Jace新年許願三角戀緋聞消失

更新時間 (HKT): 2021.02.13 06:00

轉眼間牛年來臨,但因為疫情影響,新一年仍有很多未知之數。一班年輕歌手李幸倪(Gin Lee)、陳凱詠(Jace)和男子組合P1X3L等決定相約在一起熱熱鬧鬧來一個快樂開年好開始。因口罩仍是近來大家的必需品,他們決定搞搞新意思,在口罩上設計充滿新年氣氛的圖案,祝願新一年大家都身體健康,世界充滿愛。

年輕一族對新年的傳統習俗未必太講究,Gin Lee跟Jace也喜歡趁農曆年跟家人旅行,但今年有疫情,沒有機會去旅行,Gin Lee更與家人分隔三地:「家姐、父母同我都喺唔同地方,今年第一次唔係同家人一齊過。試吓視像食團年飯、拜年,約好咗時間,爸爸媽媽都悶,一家冇試過咁樣視像。」以往的新年,Gin Lee堅持盡量有假放,「試過有一年冇攞假,嗰年初四有音樂會,但好後悔囉!因為係初四做騷,之前備戰就住唔玩唔食,好似冇過年咁。當完咗騷,初五想玩但其他人就返工,錯晒!所以嗰次好似冇過年一樣,覺得除非有好緊要嘅工作,如果唔係都盡量攞假。」

Jace的父母喜歡泰國,所以農曆新年習慣一家人到當地旅遊,她笑說自己似泰國人:「同學以為我係泰妹,返鄉下。而且我又似,每年農曆年都去喎!仲唔係泰國人?膚色都因為每年去所以有『補色』。後來都唔解釋,但一講泰文就穿煲。」雖然家人不執着傳統習俗,但Jace亦會向父母斟茶兼講恭賀說話𢭃利是,但Gin Lee在旁指不是由Jace親自沖茶略欠誠意,覺得應該向母親學沖茶,把傳統承傳下去,Jace亦覺得可以嘗試學沖茶。

新年新希望,Gin Lee和Jace不約而同希望有實體騷能跟歌迷互動,Jace在去年尾被緋聞纏身,被指與顧定軒和導演陳健朗陷入三角戀,她希望新一年緋聞不要再炒旺下去:「緋聞唔好炒旺,旺係好,旺事業好啲,炒吓啲歌聽吓就夠,我而家同工作拍拖,好熱戀相愛。」而Gin Lee去年未能舉行實體個唱,舉辦網上音樂會儲足經驗,希望2022年能舉行實體演唱會再踏紅館舞台。

P1X3L三人反而較講究傳統,George跟家人十多人每年會堅持一起食團年飯:「要全部人在場,一定要齊齊整整,食完飯就食湯圓。今年疫情要喺阿嫲屋企食,齊人好熱鬧,之後通常會一齊玩魚蝦蟹應節。」Marco表示家人希望花開富貴,所以每年都會買桃花;而Phoebus就趁新年跟母親親近:「我每年都會錫佢,平時唔會錫,(新年)有一個契機,媽咪鍾意聽祝福佢後生、青春嘅祝福語,講完一連串後我就錫佢一啖。」

今年P1X3L三人都會雙線發展,同時參與ViuTV的劇集和節目,但他們在娛樂圈剛起步,雖然參與過《全民造星II》,但網民對於這個組合不看好,大呼「唔好啦!」不過他們沒有因此意志消沉:「唔會被打倒,抨擊好少,但起碼有人留意。可能要啲時間消化,第一次睇可能覺得我哋唔係好襯,但隨後發表更多作品,可能會改觀。會將大家講嘅嘢化為動力,希望未來作品做得更好,然後鍾意我哋。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner