溫碧霞圈中富婆日本峇里島都有樓 感恩:我人生真係好精采

更新時間 (HKT): 2021.02.13 12:45
攝影、攝錄:陳慧安

溫碧霞(Irene),15歲未成年入行,在娛樂圈燃燒了青春歲月,轉眼已入行40年,她曾感性留言:「人生只有one take,一定要活得精采,活一個美麗的人生。」

跟歲月敵人作戰,Irene贏了漂亮一仗,身材仍然纖瘦,皮膚保持白晢,歲月雖留痕迹,但天生的性感,仍是騷到入骨。「我覺得我人生真係好精采,由我15歲入行開始拍戲,經歷高高低低,有最紅時候,亦都有最低落時候,乜嘢都經歷過,而家我嘅事業生涯同家庭都係最佳狀態,有一個好幸福家庭,有一個好錫我老公,有一個好乖小朋友,工作仲係有好多夢想,成立咗自己工作室,攞咗最佳女主角,已經完晒我嘅夢。」前年,Irene憑電影《墮落花》獲第8屆絲綢之路國際電影節影后。

除了拍戲之外,Irene原來是一個畫畫高手,曾拜師學繪畫的她,原來有專業水準,畫作可以用作拍賣,「啲畫捐晒去做慈善拍賣,幫山區小朋友,最高一幅好似十幾萬,啲人好有善心,知道做善事投我啲畫。自己好鍾意畫畫,但好細個已經開始拍戲,一直冇機會,結婚後有段時間跟咗一個畫家學,每次畫畫都唔同心情,自己好鍾意畫畫感覺。」

Irene曾在社交網貼於家中花園畫畫的相片,令清水灣愛巢曝光,而之前她貼豪宅騎馬相,令網民誤會是她的豪宅,「好誇張,我都唔明點解變咗我屋企,我喺內地都冇屋,其實係朋友別墅,佢有馬場同有養馬,知道我好鍾意馬,即刻車隻馬嚟別墅同我玩,我覺得好型,好少見到馬會入到屋。」

雖然在大陸冇物業,但愛買「磚頭」的Irene,在香港、日本和峇里島共擁4層樓,堪稱圈中富婆,「我都冇乜嘢要花錢,除咗投資之外,買樓可以保值,咁多年嚟自己都儲咗積蓄,而我都好開心,香港有2間屋,另外仲有日本、巴峇島,thank god,喺自己鍾意地方買到自己鍾意嘅嘢,我已經好滿足。」

入行多年的Irene很感恩,「仲係有好多機會,其實好難,已經做咗咁多年,要回報番鍾意我嘅粉絲,拍多啲好戲同做善事。」今個農曆年,她會留港陪家人度過,之後便返大陸夥拍影帝張家輝拍電影《731》,導演是趙林山,「自己都好期待。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner