港台潘杰寧戴口罩set頭要住隔離營 節目拍檔泰山隔日先收衞生署指示入竹篙灣

更新時間 (HKT): 2021.02.14 17:34

本港昨日(13日)新增12宗確診武漢肺炎個案,其中包括一名港台髮型師,由於該名髮型師在傳播期仍有上班,與他相關的密切接觸者都要隔離檢疫。港台指該髮型師負責7個節目,至少有3名員工被列作密切接觸者。張竹君在記招上指有傳播風險:「如果係畀佢吹過頭或整理過髮型,我哋都覺得係有高危因素」。

港台節目主持、前有線體育主持潘杰寧(Kelena)晚上在IG透露,已做快速病毒檢測,結果呈陰性,她無奈說:「我冇事(暫時)。」但因被列作髮型師的密切接觸者,需要入隔離營,餘下的農曆新年假期要在隔離營度過。

Kelena鼠年收爐前,最後一項工作是年廿九晚(10日)返回港台為直播節目《日常8點半》做主持,當晚節目有戴口罩,除了節目拍檔泰山,還有訪問兩位嘉賓,分別是香港營造師學會會長謝偉正、學者李錦。Kelena晚上回覆《蘋果》透露,年廿九晚開工是由確診髮型師負責,因此成為密切接觸者,化妝過程有戴口罩。據知,現時有幾位港台主持、幕後需要隔離。

Kelena又說:「其實都幾混亂,因為唔係好知佢哋決定『密切接觸者』嘅準則係點,都同港台傾咗一陣,因牽涉到好多人,我有畀髮型師set 頭要隔離,好似泰山冇畀佢 set 頭又要,因為同一個空間出現過,但又有啲同事唔使,大家心情都好矛盾,全日就不停擔心,唔知使唔使隔離。」由於時值新年,Kelena都有與家人食飯,令她相當擔心:「另外因為呢兩日都有同屋企人食飯,我自己中招都唔驚,係驚傳染畀老人家同小朋友,好彩我下午時一知道有確診個案,我就已經即刻去做咗快速測試,係 negative。」

節目另一主持泰山今日(14日)接受《蘋果》電話訪問表示,收到衞生署通知,現在要去竹篙灣接受隔離:「我就奇怪嘅,第一個反應係,我光頭喎,嗰個原因係乜呢?衞生署就話因為我喺同一個空間接觸10分鐘,所以要隔離!呢個安排我覺得有少少黑人問號,因為我全程戴晒口罩,又冇同髮型師傾偈,我唔知衞生署標準係點,所以冇辦法啦,令大家安心啲係OK。」泰山指自己身體沒任何不適,但現在疫情反覆,他亦擔心幾時會中招。

截至昨晚,最少7位港台員工、5位節目主持人及7位嘉賓被列作密切接觸者,當中包括主持《議事論事》的資深大律師余若薇。港台將確診髮型師負責的《城市論壇》暫停一集,其他節目播放暫時維持正常,電視大廈會進行深層清潔。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner