TVB派利是遊戲驚現「999」字頭電話賴觀眾寫錯 網民質疑:要綁定㗎喎

更新時間 (HKT): 2021.02.14 15:04

無綫上周三舉行《睇電視 𢭃利是 融易過肥年》記者會,宣佈年卅到大年初三向全港觀眾派發逾40萬封利是,總值超過2千萬利是錢及電子現金券。不過,近日就有網民發現,大台在《東張西望》尾段公佈的得獎電話號碼中,竟出現了「999XXXX」字頭號碼。根據通訊事務管理局網頁,999屬緊急求助電話,若市民打頭3個999,電話已接駁到香港警務處指揮及控制中心運作的緊急求助服務,網民紛紛狠批抽獎造假。

「公務員secrets」FB專頁昨晚出post「唔通香港警察都參加咗TVB派利是?」並上載了一張得獎截圖,大台公佈得獎電話號碼頭4個號碼,但其中一個得獎number竟是「9994XXXX」,而《蘋果》記者翻查節目,亦看到其他得獎片段中,出現了「9995XXXX」和「9998XXXX」號碼。未知究竟是無綫出錯,還是有參加觀眾登記錯資料?

不過,事件就引來不少網民質疑大台抽獎造假,留言批評:「即係全部都係假」、「垃圾電視台」、「而家左手交右手?畀咗自己友?」、「本應打999可以求助」、「CCTVB造假唔係第一日嘅事」、「若要人不知,唔好太低 B」、「9994xxxx咁難攞嘅電話都畀你攞到」、「以假抽獎呃收視有冇犯法」、「999只能作緊急用途」、「99字頭已經係緊急服務」、「小學1年級已經教撳999就係報警, tvb請咩人返嚟做節目㗎」、「臨時演員都係演員,可唔可以做戲做得專業少少」,也有不少網民表示:「笑到反艇。」

此外,不少網民表示抽利是只抽到$1.8,留言寸爆無綫:「我情願佢寫『恭喜發財』好過」、「我兩晚都係$1.8呀!有冇搞錯呀?根本就唔係想派利是畀市民,有可能D大利是係派返畀TVB嘅員工或家屬,罷睇TVB嘅節目,明呃人。」、「要吸引新客開戶就好心出手唔好咁肉酸啦!」

網民更紛紛到TVB官網FB留言質疑造假,由於群情洶湧,TVB留言回覆:「因為登記過程中,觀眾有可能輸入不正規電話號碼。這個電話號碼有機會被抽中,但因不能接收SMS,所以最終不會送出利是錢。」除了TVB,保安局、通訊辦、警務處等都以模稜兩可的答案回覆傳媒查詢,未能解釋可以「999」字頭號碼能成功過關。

不過,對於無綫相關解釋,有網民就提出疑問:「玩呢個活動首先要用WeChat綁定手機號碼㗎喎,WeChat係點樣驗證到緊急服務電話?大家幫我追問吓XX銀行,以及有份Hard Sell嘅Crystal Fung馮盈盈、陸浩明 6號!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner