朱慧敏醫生老公大細路洩「蜜」 月老牽線學識相愛要互相圓滿

更新時間 (HKT): 2021.02.14 00:00

「百世修來同船渡,千世修來共枕眠。」在茫茫人海中,兩個人能夠相遇、相愛到結合,並不是一件容易的事。因為林盛斌(Bob)的穿針引線下,朱慧敏(Queenie)與本身是心臟科醫生的陳良貴(Jason)認識,撮合了這段姻緣,兩人在上月結婚,正式成為夫婦。

今天是大年初三,同樣亦是情人節,這對新婚夫婦日前接受《蘋果》訪問,當日結婚消息傳出後,外間都感到突然,皆因一直都未聽見Queenie有新戀情,但她笑稱從未低調處理這段關係。兩人拍拖與普通情侶無異,經常外出拍拖行街睇戲兼食飯:「我哋好多地方都會去,可能開始拍拖唔係太多人出街,跟住到疫情嘅時候,個個都戴晒口罩出街,只係咁啱冇俾人影到。」

訪問當日,Jason工作過後匆匆趕到,Queenie早已準備好一切,例如訪問所穿的衣服,以及麵包和橙汁等小食給老公充飢之用,Queenie應要求準備了不少相片,剖白兩人的相處經過,從擺pose拍攝到坐定定接受訪問,兩人只需一個眼神便明白對方的意思,臉上不時流露出甜蜜笑容。

Queenie將手中的相片隨意地逐張逐張放在枱上,在旁的Jason靜靜地看着太太的舉動,其中一張是Jason笑容燦爛地抱着一束花,原來當日是Jason生日,Queenie親自送花到診所:「嗰日我諗住畀驚喜佢,呢次係我第一次去嘅辦公室,不過佢去咗巡房,返嚟先見到我,佢好開心,成塊面都紅晒。」Jason笑稱當時未有人知道兩人的關係:「真係估唔到佢會嚟搵我,之後都有啲姑娘開始懷疑,但係又唔敢直接問,都係估估吓。」Jason將重點放在最後才補充:「呢次係第一次有女仔送花畀我。」

冇諗過我太太會係娛樂圈嘅人

談到這段姻緣,Jason直認是意料之外的事:「之前都好多有人講過話要介紹女仔畀我識,但通常係講講吓就算,甚至連我自己都話過介紹男仔畀朋友,有陣講完都唔記得咗啦。老實講,我又真係冇諗過我太太會係娛樂圈嘅人,一來我哋呢行好少接觸娛樂圈嘅人,大家嘅生活方式唔一樣,究竟係唔係夾呢?呢個都係疑問,所以開頭我當係識個朋友,冇壞呀。」

相處過後,Jason這疑問一掃而空:「雖然大家諗嘢嘅方式未必係一樣,但係大家個心都有一個理念,佢心地真係好好,任何嘢都想做到最好,好為人(設想),任何嘢都係向好嗰方面諗,同我諗法一樣,所以咪一拍即合,好慶幸佢成為我嘅太太。」在旁的Queenie亦說:「喺認識Jason之前,我都用咗好多時間去了解同認識自己,到咗Bob話介紹男仔畀我識,我都係保持開放態度,冇話要識個男仔就話要結婚,所以你問我,我會係覺得天時、地利同人和,好多嘢係好自然。」

之不過Jason追女仔的方式都頗為特別,Queenie大爆兩人的拍拖經過:「嗰陣我哋仲係朋友,我去學咗肌力學療法,搵埋佢一齊上堂聽吓,佢又應承喎,咁我哋一齊去返學,放咗學食飯就送我返屋企。過咗一段時間,佢突然間有一日好認真咁講:『我係好鍾意你,好想你做我女朋友,計劃係我哋拍一年拖,第二年就結婚!』聽完之後我都呆一呆,咪同番佢講:『多謝你鍾意我,但係我哋未拍拖喎,第二年就結婚?』點知佢話:『我好相信我嘅直覺,我係冇睇錯,我知係得嘅!』跟住就問我可唔可以做佢女朋友,我係好欣賞嘅坦白同直接,而且仲好有承擔,既然咁有誠意,相信佢都係一個非常好嘅人,所以咪拍吓拖交往吓啦!」

揸揸吓車都會問:「Will you marry me?」

兩人拍拖一年,Jason已履行承諾,向女友提出結婚,求婚方式亦都與別不同,Queenie笑說:「我唔知點樣先叫正式求婚,佢架車上有幾隻歌都係嗰啲marry me呀,日日都聽住,有時候揸揸吓車都會問:『Will you marry me?』變咗件事係好自然就發生。」Jason續說:「我哋相處得好舒服,大家都好夾,所以無謂再等喇。本來有諗過去外地註冊結婚,始終太太係藝人,如果登記咗,好快好多人就會知,奈何因為疫情問題,邊度都去唔到,嚟緊嘅日子亦都好難預料,無止境咁等都唔係辦法,所以既然係咁,不如喺香港搞就算。」笑問Jason是否有職業病,藉住驚喜測試另一半的心臟「夠唔夠強勁」?他笑笑口說:「都係㗎,可以慢慢測試吓!」問你服未!

問到兩人的婚姻生活,Jason說:「結得婚即係代表你認同嗰個人係你嘅另一半,想同佢過埋下半世,所以結咗婚嘅感覺都係一樣, 當然你都會覺得個人係要成長,唔再係以前咁大細路,要有承擔,要諗吓大家嘅將來。」聽到老公表示不再做「大細路」,Queenie忍不住再洩「蜜」:「佢係有少少咁,喺我哋籌備婚禮嘅時候,有一日佢揸揸吓車,突然話大個仔,心情又好興奮,我覺得佢已經好有承擔同大個仔,我咪同佢講,keep返好似以前咁就得,今次當係一個party,着靚靚一齊玩。」

用咗好多時間去了解同增值自己

一直以來,Queenie的人生道路以及情路的發展並不平坦,某程度上可以用崎嶇去形容,其後她決定到美國修讀臨床催眠治療課程,希望可以幫助到有需要的人,在學習過程上,更加了解到自己,她有感而發地說:「我哋嘅關係好自然,未遇到佢之前,我已經單身咗兩年,之前又on and off咁,我用咗好多時間去了解同增值自己,可能我喺心靈上有啲創傷,用啲時間去療癒咗我自己。」

反思以往的戀愛態度,令Queenie開竅:「以前我都愛自己,不過可能方式唔同,唔係好懂得,由細到大都覺得要愛人如己,即係愛人,變咗好多嘢係我付出,乜嘢都為人哋諗先。」Queenie沒否定要關心別人,但自覺以前會因為關心人到忽略自己需要,變成不斷付出:「而家明白好多嘢係相對,學識咗要取得平衡,所以我遇到佢,我覺得我哋嘅關係唔係0.5+0.5,而係1+1,大家都好獨立,而唔係對方填滿咗自己嘅缺失,反而係好順理成章,成件事係好圓滿。」

經歷過後,Queenie坦言目前的情感亦相當獨立:「以前過時過節,如果得番我一個嘅時候,會覺得好孤單,但係而家唔會,反而多咗啲體諒同支持,譬如Jason要on call,食食吓飯收到電話要即刻返醫院,我梗係百分百支持,有陣時仲會揸車送佢返工。我而家會好好照顧我自己,等佢安心返工,可以專注工作,專注照顧佢嘅病人。我好感恩過去喺娛樂圈嘅生活,慶幸叫做有啲訓練,知道捱更抵夜嘅生活係點。」Jason亦感謝太太的支持:「佢真係冇怨過,一直都好支持,有陣半夜三更電話響,以前醒咗好難瞓得番,但係佢喺側邊叫我瞓番,所以而家瞓覺係好咗。」

禮物着重心意和背後意義

Jason每日要照顧不少病人,要從病人的利益出發,務求用最好和最快捷的方法令病人早日痊癒,久而久之,早已習慣了實際和實用,太花巧的東西,似乎很難在他身上發現,所以婚後第一個情人節驚喜,Jason坦言未有頭緒,不過他覺得禮物不在乎價錢,反而是心意和背後的意義。Queenie笑着說收過老公曾親手做的一份小禮物:「佢知道我要上Zoom,有陣時會用電話,所以佢試過用3D printing設計咗個心送畀我,等我可以用嚟當電話座。」

接着再問到拍拖的難忘事,Queenie說:「佢送過一條金色嘅鎖匙同信用卡,好難忘,以前未試過,佢畀條鎖匙我嗰陣話:『呢個係你嘅屋企。』佢畀一個家我,係一份安全感。之後佢畀信用卡我,都唔捨得用,唔想刮花張卡,隔咗幾個月都冇用,但係佢叫我用,用咗佢會開心啲,之後我去咗超市買咗支橙汁,呢啲唔係錢嘅問題,係一個承諾同照顧。喺佢心目中,原來我嘅價值真係好高,係如珠如寶,會將最好嘅嘢畀我,原來呢個世界係會有呢啲人咁樣去照顧自己,因為我花咗好多時間喺自己身上,令到我學識咗愛自己,珍惜我自己,發放到呢個頻率吸引佢。」

至於將來的日子,他們不諱言不會刻意計劃太多,Queenie還說:「除咗工作set咗目標一定要達成之外,日常生活嘅嘢憑感覺就得,大家相處融洽,開開心心、簡簡單單就夠,最緊要係健健康康,尤其係而家疫情,佢又喺醫院工作,屬於高危,對於我嚟講,最好嘅禮物同祝福,每一日瞓醒見到佢都健健康康,之後精精神神咁返工,再平平安安咁收工返屋企,已經覺得係最好。」Jason亦說:「我都覺得係,每日起身精精神神,第一眼見到佢開心,做到自己想做嘅事,我就好開心同滿足,我哋平日都見到好多唔同嘅故事,健康平安,已經係最大禮物。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner