伍詠薇飲酒作樂 借醉示愛

更新時間 (HKT): 2021.02.14 02:00
■伍詠薇自爆曾經當着很多巨星面前,嘔到成地都是紅酒。

伍詠薇(伍姑娘)平日生活甚有情趣,《蘋果》特意找來伍姑娘及熱愛打扮的「綠魔」許嘉浩(Karl),講講平時去玩去蒲的趣事,伍姑娘更大爆飲醉酒的醜態:「我曾經當住好多巨星,嘔到成地都係紅色。」又指飲多兩杯,會向心儀的男人示愛。

伍詠薇和老公練海棠結婚20多年,恩愛如昔,不過講起今日情人節,她說:「今年我約埋陳山聰同埋陳敏之兩對couple,一齊嚟屋企過年。」三對情侶難免會飲酒作樂,喜好杯中物的伍姑娘指現在愛飲清酒:「其他酒我唔飲㗎!尤其平嗰啲,年紀大咗要養生。」問到她會飲哪種清酒,她如數家珍,「十幾代嗰啲咁高貴嘅,我會收埋唔畀人飲,分割50%嘅精米步合其實已經好啱飲,口感有哈密瓜味係我推介,太dry嗰啲我唔飲,熱嘅清酒我唔飲。」許嘉浩指情人節當日會開工做節目主持,教人打扮,又大爆伍姑娘有時會在中環高級地方,自己開一支香檳享受,伍姑娘笑說:「我嗌一杯啫,但因為識人,就成支擺喺度。」

嘔到成地紅酒

講到情人節應該和情人飲甚麼酒,伍姑娘指:「睇吓對方鍾意飲啲乜,應該先嚟兩杯香檳,如果飲啲有氣泡嘅酒,同其他酒撞,就好似打保齡咁砰一聲全中。如果想灌醉對方,就飲啲烈酒whiskey,或者雞尾酒甚至茅台都得。」提到過往情人節發生過甚麼最浪漫,她說只要人浪漫就幾時都浪漫,又自言真性情:「如果飲多兩杯,我會示愛,會主動講,你係我鍾意嗰類型。好多人對住鍾意嘅男人,對方問你出唔出去都唔出聲,我就一定會好爽快答應,如果佢覺得我太坦白怕咗我,𠵱家咪入咗後悔會囉!」

伍姑娘又分享飲醉酒經歷:「有一年生日,我請晒好多演藝界巨星去朋友第一日開張嘅私房菜,佢全間餐廳佈置都以白色為主,我嗰日勁飲紅酒,飲到中途醉咗,攬住個馬桶嘔,嘔到馬桶都塞埋,又嘔到個大洗手盆都塞咗,跟住出返去先發覺出面成地紅色,張枱全部都係反芻物,第日打返去道歉。」她指身旁的Karl好飲得,Karl說:「我從來唔會飲醉,可以連飲三日三夜。」

不喜歡收禮物

問到喜歡收甚麼情人節禮物,伍姑娘自言不是想收禮物那種女仔,未婚前反而會送花畀男仔:「如果你同我好老友,我會送花去你公司,無論男仔定女仔。」提到初三是赤口,如果飲大兩杯,鬧交怎辦?她笑說:「冇關係,我日日都赤口,𠵱家好少同情人嗌交,一隻筷子打唔響,身邊嗰個人都差唔多係啞,所以根本嗌唔到交。」不過之後她打圓場:「佢會講嘢嘅,但我要嗌交嘅話出面搵人嗌,因為驚唔練會生疏。」

伍詠薇

化妝、髮型:miss 5 studio

服裝提供:miss 5、IIJIN

首飾提供:ARTE MADRID

許嘉浩

化妝、髮型:Kat Chan@KC Makeup School

服裝提供:H.K. Pop

首飾提供:Dearest、Maggie Nails

娛聞樂陪你走遍全球追星,即Like「娛果」FB 專頁!
BannerBanner