田中小新激情對話險焫㷫對方 麥詠楠教你馴服麻煩女友

更新時間 (HKT): 2021.02.14 09:00

今天是大年初三兼情人節,《蘋果》邀得早前在《全民造星III》令人眼前一亮的麥詠楠(Buber),及被卓韻芝點名力讚的男男配田見超(田中)與許紹燊(小新)上演「新春情人儍膠膠劇場」,示範最無厘頭、最意想不到、最儍豬豬的「一句激嬲女朋友」真實版。

三人要分享被情人激嬲的經驗,受訪期間,田中與小新如入無人之境,不時互相傷害,看得暫時單身的Buber又驚又羨慕,更自嘲是「憑實力單身」。田中與小新拍拖三年多,問到他們如何慶祝情人節?小新笑謂:「天天都是情人節。」田中即忍不住反擊說:「天天都是情人節係藉口。」後來才改口,指天天都是情人是真理,因為兩個愛錫對方的人,不應該因為情人節才愛錫對方:「我好少買花,大家睇我喺節目送花畀佢,可能係……」小新緊接着說:「唯一嘅一次。」

田中便解釋男士很少送花:「女仔就應該送吓嘅,通常我會買零食、買啲好靚嘅甜品、盡量整到類似禮物咁送畀佢。我唔鍾意好刻意咁買一樣嘢,刻意買通常揀得唔好,唔需要睇佢價值。」小新搞笑地以白眼還擊,他又爆被田中激得最多,就是對方發自己𤷪𤺧的時候:「佢最常激嬲我係佢亂咁嚟,佢憎恨呢個世界,封信放歪少少又激嬲佢,隻蛋打歪少少又激嬲佢,揼垃圾都激嬲佢,我就會好𤷪。」的確另一半忽然厭世,實在令人很苦惱。然而田中向小新「回禮」的例子,同樣叫另一半摸不着頭腦,他說:「佢通常激嬲我嗰句就係『我瞓覺喇』,即係明明佢提出個話題同我討論,佢講完想講嘅嘢之後就瞓,我都未講。」小新聽罷即為自己平反,笑指田中很長氣:「佢一講就講三個鐘。」田中坦言自己性格有點像女生,總希望伴侶多聆聽自己的內心世界,但男士普遍較粗枝大葉,心思不如女生細膩。

至於,實力單身代表Buber又如何?她坦言自己太簡單,生活從來沒有儀式感:「所有嗰啲節日,我都唔記得亦冇所謂,我連聖誕節幾多號都唔知,如果我再咁迆(hea),應該會迆到80歲,所以都覺得要開始注重吓啲節日。」鏡頭前出盡萬二分力的她,私下的生活就像平線,Buber說:「我係好悶嘅,好彩之前我另一半都好就我,但係而家又覺得要試吓新嘢,如果唔係冇咗新鮮感,好容易就冇咗。」問到另一半怎樣的行為令她最討厭?她笑謂:「我嬲嘅時候,佢存在我已經好嬲,哈。」

現實中,三人是他也是你和我,說到底情侶間還是最着重關心、溝通和包容,吵架可以,但不可含怒到日落,只要還是希望牽着對方的手,就好好磨合吧。鏡頭下,三人極盡「儍膠膠」本色,演繹來自網民的真實生活對話,祝大家開開心心過牛年,笑口常開!

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner