馬國明好大機會先有後婚 麥玲玲叫大家儲定人情

更新時間 (HKT): 2021.02.15 17:29

馬國明、黎諾懿和胡鴻鈞日前接受麥玲玲和林盛斌(Bob)主持的《師父有請》節目訪問,講到「旺夫旺妻」的話題,麥玲玲舉例黃杏秀、蔡少芬、孫儷、汪詩詩等都是旺夫女人,已婚的阿Bob藉機大讚老婆旺夫,而娶了前港姐李潔瑩被冠上「五億駙馬」稱號的黎諾懿則說:「老婆簡直係賢內助啦!識咗老婆之後,運勢一路好,尤其個仔出埋世之後更好,有師傅話我哋屋企連珠,我需要水,我老婆係水,我由頭到尾都好愛我老婆,好似初戀咁。」

黎諾懿自爆是在醉酒情況下跟太太一見鍾情:「我太太係周美欣介紹,之前約咗一年幾都冇機會見面,有次我同美欣都飲醉,太太就嚟接美欣,嘩!我見到佢覺得好靚喎,係佢喇!所以醒咗之後有少少後悔,不過酒醉都有三分醒,我有問佢拎電話,我太太談吐舉止等所有嘢都好吸引。」問到有個富貴老婆是否有壓力?他直言:「識我太太時已經冇乜理屋企生意,佢交畀哥哥理,只係做副線生意,好少參與屋企業務。」

麥玲玲問到三位會否介意成為「駙馬」時,手指不小心指向黎諾懿,他即笑說:「你拍呢邊做咩?我白手興家㗎喎!」麥玲玲續爆曾有富豪的女兒很喜歡馬國明求介紹,馬國明即反問:「咁你唔介紹我識?」麥玲玲坦言:「咁聽聞你有少少悶嘛!不過佢冇阿湯(女友湯洛雯 )咁靚。」

麥玲玲覺得馬國明一向異性緣強,但從不主動,「成日聽到唔少女人講,陳豪未結婚前係圈中最大筍盤,先揀陳豪再到馬明,馬明係值得嫁完再嫁嘅男人。」馬國明聞言笑說:「我唔覺喎!我同胡鴻鈞諗法差唔多,大家夾自然會少啲拗撬,咁樣已經好。我感情事唔會影響工作,曾經試過有啲性格唔啱就會鬧交,冇話邊個唔啱,過去咗就冇問題。」他自言從未發生過一見鍾情,每段感情都是相處一段時間之後才開始發展。

湯洛雯曾提到不斷被催婚,而男方一直沒行動,又揚言用視帝獎來換結婚,馬國明表示:「佢都係講笑啫!我結婚就話畀你聽啦!」麥玲玲直指馬國明好大機會先有BB後結婚,全場即時起哄,黎諾懿說:「咁阿湯要出絕招喇!」馬國明卻說:「我覺得呢個機會微啲,應該唔會中咗先結婚,希望係結咗婚先有BB,咁我每一次拍拖都係向結婚方向諗,因為我係好現實嘅人,唔結婚嘅話,拍拖係好浪費時間,你知我哋開工成日都冇得瞓。」麥玲玲指今年4至6月是良辰吉日,叫大家儲定人情賀馬國明。

至於剛被揭與蔡思貝拜年見家長的胡鴻鈞則被追問有否拍拖?他尷尬回應:「我真係唔知今日講呢啲,我以為講事業,不過我唔係好相信旺唔旺夫,好多嘢都應該互相磨合,最緊要係同對方性格夾。」麥玲玲又指三人之中最旺女人緣是胡鴻鈞,不過容易三妻四妾,亦會較遲婚。胡鴻鈞自爆:「我以前讀男校,都有同性朋友追求,我後知後覺,以為好friend,點知原來佢對我有意思,佢見到我同我初戀女友一齊就好傷心,佢覺得我玩緊佢,覺得我對佢都有意思,但其實只係好朋友,好多時間都一齊玩同去街,喺我世界入面,朋友之間咁樣係好正常,佢就覺得一定有啲嘢。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner