馬浚偉長年累月受樓上單位噪音滋擾 報警無用循民事訴訟尋求解脫

更新時間 (HKT): 2021.02.15 15:34

馬浚偉早前在facebook開了一個名為「全港噪音滋擾聯盟」的專頁,原來過去1年他深受噪音滋擾,目前正委託大律師循民事訴訟尋求解決方法。昨晚凌晨他在facebook直播講述來龍去脈,他表示接近11時準備就寢,樓上又發出隆隆巨響,他指這情況自去年3月開始就無間斷地重演着,其間試過報警、向業主立案法團及管理處投訴等,情況非但沒有得到改善,反而遭到樓上單位的一位太太「大力拍門」,並揚言「買起你個單位」、「唔鍾意就搬走」。

馬仔說:「投訴佢,佢又去報警,警察上嚟,有我紀錄,上幾次報過警,警員唔能夠真係做到啲乜,警察走咗,佢又重施故技。佢太過自以為是,覺得製造噪音都係合理,上次佢同管理員講,受唔到佢啲噪音,買起我個單位,叫我搬走。有時做人係咪需要俾人蝦到上面唔出聲呢?雖然對方係女性,我亦三番四次通過管理員講,但樓上嗰位太太有恃無恐,嗰種騷擾係刻意等你瞓咗覺,我係7點鐘起身,夜晚11點前上床,每晚呢個時候就聽佢揼嘢落地下,唔知點解佢可以製造咁大聲音,已經冇辦法可以理解。」

他表示試過好言相向、管理公司出警告信、報警等,最後還是接納作出民事訴訟的建議。有網民留言問律師信是否有用?馬仔直言:「有冇用唔係我哋決定,民事訴訟最大特點係,儲齊證據先,我已集齊包括錄音、錄影、投訴信、投訴紀錄,最後交畀法官去判。如果乜都諗冇用唔去做,就有人繼續去惡,相信有錢就大晒,我哋窮家仔大,偏偏唔信有錢人大晒。」

投訴不成反被滋擾

最令馬浚偉不忿的是每每睡到半夜,就遭樓上疑是掟物件發出的聲音所驚醒,曾因向管理處投訴,而反遭對方登門滋擾,雖然警員和管理員也在他家聽到樓上的噪音,但無能為力:「管理員去到樓上單位,佢反過嚟報警話樓下騷擾佢,真係有趣。我努力做一個守法有良知市民,一定盡我能力去搵解決方法,係咪有噪音管制法例、係咪有人可以申到冤、違法嘅人係咪可以得到教訓?」

有網民提議馬浚偉搬屋,他強調絕對不會搬走:「我要佢知道始作俑者,知我報警就先報警話樓下騷擾佢,佢有次喺我門口講『我知你乜水』,佢哋以為藝人會好驚,我係普通市民,享有自己權利,唔會因為公眾人物身份有專利或忌諱。你話自己有錢,叫我報警告你,叫我搬走買起我單位,令我覺得討厭,有錢唔係大晒。不停製造噪音,將呢件事公開,真心講唔係為自己,同我面對同一問題嘅人好多……我想問樓上係咪有錢就大晒?」

因為馬浚偉開設了「全港噪音滋擾聯盟」,因而得知羅冠蘭也是苦主,他說:「羅冠蘭都話受到呢種折磨,但唔知可以點做。朋友話忍,我唔會忍,用我合法方法去解決,窮一身都要撐落去追究呢件事,不求賠償,只希望佢醒悟、醒覺,明知都唔收斂繼續去騷擾別人,做人不能太自私,每個人嘅家係屬於佢哋自己,不論大細、高低、富窮,唔係有錢就可以買起人哋個單位。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner