阿Dee@Error勁舞擘髀爆褲 盧覓雪:佢係鄭中基接班人

更新時間 (HKT): 2021.02.15 17:19
阿Dee勁歌熱舞導致爆褲。

盧覓雪與Error的何啟華(阿Dee)主演的網劇《向西聞記 新春sp:阿姨!我不想努力了!》,年初一在hmvod首播,成為該平台歷來首播日觀賞數最高的節目,由《復仇者聯盟》(The Avengers)及《TENET天能》(Tenet)手上搶下皇座。

阿Dee和盧覓雪對成績表示滿意,初一一齊開live講趣事,盧覓雪更爆阿Dee「爆褲」醜事。劇中有場戲講述阿Dee要抱住向後拗腰的盧覓雪,因為阿Dee擘髀擘得太低,導致條褲爆胎,裂縫橫跨整個褲檔,全場爆笑。阿Dee最後換上單車褲繼續綵排,爛褲由服裝阿姐修補,阿Dee話:「我聽到『啪』一聲,就知爆咗胎,擘得勁得滯,『弓』字步嚟得太行,條褲承受唔到,唔關雪姐事。仲擘唔挈?擘!陣間照擘,就拍畀你睇我爆胎。」

盧覓雪亦笑說:「我笑到肚都攣埋,因為佢一路扮嘢一路擘腳,我笑到氣咳,阿Dee有啲部份扮劉德華,佢扮華仔出名,呢次佢近距離喺我眼前現場咁扮,排戲時候我笑到斷氣咁滯。」她笑言一望到阿Dee扮劉華樣就忍不住笑,大讚對方有喜感,就如鄭中基、林雪等天生的喜劇人才,更揚言:「我覺得佢係鄭中基接班人,好識搞笑又好好笑。」

另外,《向》片監製蕭定一、導演吳漢邦、編劇吳兆麟及女主角盧覓雪,昨晚在新興社交平台Clubhouse開房聊天,蕭定一話大年初一邊睇《向》片邊喊,喊足15分鐘,他說:「我對成績相當滿意,嗰日我真係喊咗15分鐘收唔到聲,因為成件事係好辛苦,感受到團隊好趕、好辛苦,由構思到上架20日咁短時間做出咁好嘅質量,好多謝主創同成個團隊,除咗香港人,仲有邊度可以做到?」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner