黃芷晴農曆新年做老闆 送自家製物品冧老竇

更新時間 (HKT): 2021.02.16 19:00
黃芷晴農曆年參加了兩至三個市集,賣自家設計的手袋等飾物。

黃日華女兒黃芷晴自大學畢業後,就跟朋友開設品牌賣首飾及時裝,閒時更會到市集擺檔,今年她亦趁農曆新年參加市集,日前她接受訪問時,她透露最近自家設計袋仔、環保物品及御守,她說:「前兩年,每逢大年初一,我都會去唸經,但上年同今年都因疫情而取消,所以農曆新年冇乜嘢做,加上又少拜年,所以我會參加市集,參加咗兩至三個朋友搞嘅市集。」問到有否將自家製的物品送給爸爸﹖芷晴笑說:「有呀,第一個就送畀佢,佢已經擸咗啲送畀佢啲朋友。」

提到去年媽媽梁潔華病逝,芷晴有點自責:「自己有諗,上年冇去唸經,會唔會唔好運,多啲唔開心嘢,但今年冇機會去唸經,所以有少少擔心。但我知道要安全為上,叫自己唔好咁諗,希望大家健健康康,重拾正軌,因為我都好想去旅行。」跟爸爸如何過農曆新年?芷晴表示應該留在家中,或者嘗試陪爸爸行一次山,又或者與外婆食飯,她笑說:「我唔識整賀年食品,淨係識煎糕。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner