沈殷怡狂數陳欣妍拍真人騷表現軟弱兼麻煩:Everyday都喺度喊

更新時間 (HKT): 2021.02.17 21:38

新增內容

陳欣妍(Shirley)和沈殷怡(Shirley)被封為「Double S」,去年因為拍ViuTV節目《美女郊遊遊》而升呢做女神,她們穿上bra top行山成為網民熱話,當日兩人在鏡頭前似乎很有默契兼互相照顧,但鏡頭後多次有傳兩人的關係麻麻,私底下更甚少聯絡。在昨晚播出的ViuTV節目《有酒今晚吹》上,陳欣妍接受沈殷怡和強尼的訪問,強尼問陳欣妍與女拍檔合作有否困難?陳欣妍表示沒有,因為讀了13年女校,習慣與女生相處:「我哋私底下都好粗獷,亦都好直爽。」不過沈殷怡直言有點不習慣:「你睇喺《美女郊遊遊》裏面,我擺明係一個男朋友嘅角色,我有陣時會覺得身邊啲女人真係太女人,覺得佢哋好麻煩,搞到我要好似男朋友咁去處理!」接着她用手指住陳欣妍說:「佢都知㗎,我好似帶條女去行山!」

接着沈殷怡扮嬌嗲聲模仿陳欣妍的語氣說:「『你唔好放開手呀,我真係要拖住你,真係要蹺住你,唔得呀,我要同你十指緊扣呀!』我心諗,點解行山十咩指緊扣呀!」陳欣妍即自辯:「因為我好敏感,要有觸感掂到,我先有安全感。」不過沈殷怡似乎唔多接受這個解釋,她突然爆seed地說:「可能因為我份人嘅性格好硬頸,又鍾意去捉曱甴,又鍾意乜嘢都死撐,好唔鍾意畀人哋覺得我係好軟弱,但係呢位小姐呢,everyday都喺度喊!」陳欣妍有點尷尬地說:「呢位小姐已經用盡畢生嘅勇氣去完成所有任務!」在旁的強尼亦出口解圍:「佢(陳欣妍)係軟弱嘅,見到佢嗰條鼻涕,你唔係唔知呀?」不過沈殷怡越講越忟:「你唔係唔知佢每日喊得幾勁呀?我每日都要呵護呢個女朋友嘅心靈,『乖啦,冇事嘅!』」

陳欣妍坦言在拍攝初期兩人的確不相熟,第一天開工已經是拍重頭戲,因為她的反應慢半拍,承認多次「激到阿沈半死」,本來她想繼續解釋下去,但沈殷怡隨即搶住說:「我好希望佢可以多啲講,多啲鏡頭,可以多啲嘢表現到自己。」後來,強尼又問兩人會否有比較?陳欣妍表示最初都擔心會有這個比較,但去到中段部份,反而變了比較在叢林中去了多少次洗手間,沈殷怡又突然「港女」上身狂數陳欣妍:「唔知點解佢有個尿頻嘅習慣,唔好意思,我爆咗出嚟,真係呢,唔知點解佢一行入到深山度就想去洗手間,每次爬到一半就話好想去,之後成隊crew就會roll機跟住佢去洗手間囉,不過最後片段出唔到街。 」

之不過沈殷怡「發洩」完之後,突然表示要講句:「唔好意思」:「因為每一日拍完《美女》之後都筋疲力盡,收工之後真係冇咁多精力去聯繫拍檔,以往我收工之後,都會問吓拍檔覺得今日拍成點呀?會唔會有啲乜嘢可以幫到你呀?有啲乜嘢可以長進到呀?但係今次真係冇做到,所以真係唔好意思,有時會諗係咪拍完我哋就停頓落嚟呢,係咪其實有機會發展可以坐低飲番杯食廚師發辦嘅友誼呢?」

陳欣妍自認麻煩

對於被沈殷怡在節目中狂數,陳欣妍今日回覆《蘋果》表示:「咁我又真係好麻煩,我集集都喊,真係好驚,好彩有佢陪我,如果唔係我真係咩都唔敢玩。由《郊遊遊》開始同阿沈都係一凹一凸,合作多次,大家嘅性格、優點缺點都好清楚,會彼此遷就(其實係佢遷就我多啲)!」

沈殷怡:係愛呀

而沈殷怡則否認自己狂數拍擋,並說:「就係因為拍檔咗咁多個節目,熟咗有默契先會互爆料。我同身邊好多拍檔好多節目都係咁㗎。觀眾想睇我哋,又了解對方底線喺邊,冇邊個數邊個,係愛呀!」

沈殷怡又指自己其實陳欣妍係女朋友咁照顧:「喺節目我都話過,就好似拍《貼身36》,我對Yoshi(余逸思)咁,我當阿陳係我女朋友咁照顧,當得係女朋友就梗係有愛,有愛嘅每對小情侶都會打情罵俏㗎啦!大家太認真喇,多謝大家過去一年咁鍾意Double S,希望大家繼續支持阿沈同阿陳!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner