劉德華回顧2020只得一件高興事 自認Yes爸都頂唔順要責罵囡囡

更新時間 (HKT): 2021.02.17 20:12

劉德華、劉青雲主演的《拆彈專家2》,經過武漢肺炎疫情洗禮,終於等到戲院重開同觀眾見面。華仔早前於九龍灣接受訪問,他形容去年的工作檔期像消失了一樣,有3部戲及2個演唱會取消,唯一值得高興的是意外多了親子時間,但亦多了責罵女兒。

對於《拆彈2》要挺着疫巿上映,華仔說:「順住個情況大家努力,亦冇得諗,大家都唔知將來會點,只好大家小心啲、樂觀啲。賣票會有管制,上映時可能疫情會有啲唔同情況出現,我諗老闆都係諗蝕住做,冇得控制。」對於本年的工作計劃,華仔說:「亂晒啦!好似2020年嘅檔期全年冇咗,舊年喺上海拍完《人潮洶湧》,之後所有戲都冇開,有3部戲2個演唱會都停咗,今年尾會開番一部戲。為咗樂觀、審慎,我哋照計劃未來一年半的工作,照計劃有演唱會。過去未開嘅新戲就解散咗劇組,暫時呢兩年我冇自己投資電影,為吸引投資者,自己公司都只係投資5%。」

繼2002的《嚦咕嚦咕新年財》後再度與劉青雲合作,華仔表示相隔十多年間,其實中間有邀請過青雲合作,他說:「有一次要求佢客串我部戲,有一日好特定嘅日子想佢嚟,但係佢拍緊戲嚟唔到,一路想同佢合作,今次搵佢覺得有少少壓力,咁多年冇一齊演戲,擔心唔係好配合,但係我覺得青雲真係一個好好嘅演員,之前我哋有對稿,大家講晒與身邊人嘅關係,好似一齊生活一次一樣,拍出來很有默契,感覺特別能打動人。」

閉關變懶再增磅

因疫情而閉關,華仔笑指主要工作變成增肥,他說:「我真係肥咗,食嘢密咗,運動越來越懶。以前5點拍完戲返屋企即刻做運動,夜晚8點食完飯瞓覺,而家成日喺屋企,諗住晏啲先做,反而懶咗。」他承認今年多了親子時間,由農曆新年開始返太太家鄉馬來西亞,因為疫情停工留至4月才返香港,整段時間陪伴女兒劉向蕙網上學習,華仔說:「無端端好似重新再讀書咁,其實以前都多(親子時間),但唔係我哋教佢做功課,多咗做功課時間。」華仔笑指正確來說並不是親子,而是增加責罵女兒的機會,華仔笑言陪讀書會忍不住口指罵女兒:「有冇搞錯,你咁都唔識!」對於華仔是惡爸爸還是「Yes,爹哋」,華仔回應:「我係『Yes,爹哋』,但係都頂唔住,好多父母都明白我嘅心態,係一個考驗,而家脾氣好過以前。」至於向蕙會否高興獲爸爸多了時間陪伴,華仔說:「我返去問吓佢先,應該開心啩。」

採訪:張俊銘

攝影:沈健程

妝髮:鄭如麗

服裝:Kolor @ Lane Crawford

場地:九龍灣國際展貿中心(KITEC)

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner