麥秋成湯怡元宵簽紙結婚 余香凝增肥20磅夏天生得

更新時間 (HKT): 2021.02.18 22:32

《狂舞派3》首映禮今晚在上環高先電影院舉行,導演黃修平帶領演員蔡瀚億(BabyJohn)、楊樂文(Lokman)及劉敬雯等出席,Mirror及Error成員均有出席支持Lokman,但不見近排是非不斷的吳保錡,兩組合成員亦未有接受訪問。

與湯怡即將奉子成婚的麥秋成今晚亦有出席, 他透露計劃今個月26號即農曆正月十五,於陽明山莊舉行簽紙結婚儀式,他說:「因為疫情限定人數,唔係太多人出席,一圍大概20人,邀請恩師、高層、老闆楊受成先生太太等,年底會再擺酒宴請其他好友。」

麥秋成指透露湯怡現時懷孕4個月,心情很好,只是有時好容易𤷪𤺧,他說:「佢冇要求我夜晚出去買嘢畀佢食,但佢由細到大見到甜嘢都會反胃,而家反而鍾意甜食。之前食嘢有反胃,而家穩定咗。而家懷孕4個月,已經知道性別,但係等之後一齊公佈。」

湯怡又買了一本書《如何成為一個好爸爸》,讓麥秋成努力學習,他說:「睇完覺得幾有趣,知道好多嘢 。而家忙住買嘢佈置婚禮,雖然係簡單佈置,但係婚禮對新郎新娘嚟講都係一生嘅一次。」

同樣因奉子成婚的余香凝(Jennifer)今日陀住BB到場支持,她表示大肚時仍有幫高先拍戲,今日一定要出席撐場,她笑言:「希望BB將來識跳舞。」Jennifer表示老公有叮囑她小心出入人多地方,她說:「今次陀得幾舒服,所以我成日唔記得自己有BB,預產期係夏天,已知道性別,但過多1、2個月先公佈,啲朋友估得咁開心,等佢哋繼續估吓先。」

Jennifer最近努力進食,肥了很多,她說:「之前醫生檢查話BB偏細,所以要增肥,最近肥咗20磅,BB大細剛剛好,我終於明白媽咪嘅偉大,希望生咗之後有瘦身廣告搵我。」Jennifer正苦惱考慮開刀還是順產,她解釋:「見到倪晨曦經常做運動都生得咁辛苦,最擔心要食全餐。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner