拍真人騷積怨 借節目發洩 
沈殷怡狂插陳欣妍麻煩 深山尿頻日日喊

更新時間 (HKT): 2021.02.18 02:00

陳欣妍和沈殷怡去年因為拍ViuTV節目《美女郊遊遊》而升呢做女神,兩位英文名都叫Shirley而被封為「Double S」,不過有傳兩人私底下關係麻麻。沈殷怡近日與強尼主持《晚吹─有酒今晚吹》,在大前晚播出的一集請來陳欣妍做嘉賓,沈殷怡酒後吐真言狂數陳欣妍,除爆對方尿頻,更指她拍真人騷表現軟弱兼麻煩:「everyday都喺度喊。」

陳欣妍和沈殷怡去年因為拍ViuTV節目《美女郊遊遊》,穿上bra top行山成為網民熱話,兩人在鏡頭前似乎很有默契兼互相照顧,但鏡頭後多次有傳兩人的關係麻麻,私底下更甚少聯絡。在大前晚播出的ViuTV節目《晚吹─有酒今晚吹》上,陳欣妍接受沈殷怡和強尼的訪問,強尼問陳欣妍與女拍檔合作有否困難?陳欣妍表示沒有,因為讀了13年女校,習慣與女生相處,不過沈殷怡直言有點不習慣:「喺《郊遊遊》裏面,我擺明係一個男朋友嘅角色,我有時會諗點解身邊嘅女人,可以真係咁女人,覺得佢哋好麻煩,搞到我要好似男朋友咁去處理佢。」接着手指住陳欣妍說:「佢都知㗎,我好似帶條女去行山!」

強尼欲解圍反變撥火頭

接着沈殷怡更模仿陳欣妍扮嬌嗲聲說:「你唔好放開手呀,我真係要拖住你,真係要蹺住你,唔得呀,我要同你十指緊扣呀!」然後表示:「我心諗,點解行山十咩指緊扣呀!」陳欣妍即自辯:「因為我好敏感,要有觸感掂到,我先有安全感。」沈殷怡繼續爆seed:「可能因為我份人嘅性格好硬頸,又鍾意去捉曱甴,又鍾意乜嘢都死撐,好唔鍾意俾人哋覺得我係好軟弱,但係呢位小姐呢,everyday都喺度喊!」被數的陳欣妍顯得尷尬,並狀甚委屈說:「呢位小姐已經用盡畢生嘅勇氣去完成所有任務!」強尼亦出口解圍:「見到佢嗰條鼻涕,你唔係唔知呀?」誰知沈殷怡更加火起:「你唔係唔知佢喊得幾勁呀?我每日都要呵護呢個女朋友嘅心靈,『乖啦!冇事嘅!』」

陳欣妍坦言在拍攝初期兩人不相熟,並因為她的反應慢半拍,承認多次「激到阿沈半死」,後來講起在叢林中去洗手間,沈殷怡又突然「港女」上身狂數陳欣妍:「唔知點解佢有個尿頻嘅習慣,呀!唔好意思,我爆咗出嚟,我講咗出嚟唔好意思!」講完繼續爆:「真係呢,唔知點解佢一行入到深山度就想去洗手間,每次爬到一半就話好想去,之後成隊crew就會roll機跟住佢去洗手間囉,不過最後片段出唔到街。 」

陳欣妍直認麻煩被遷就

對於被沈殷怡在節目中狂數,陳欣妍昨以短訊回覆《蘋果》表示:「咁我又真係好麻煩,我集集都喊,真係好驚,好彩有佢陪我,如果唔係我真係乜都唔敢玩。由《郊遊遊》開始同阿沈都係一凹一凸,合作多次,大家嘅性格、優點缺點都好清楚,會彼此遷就(其實係佢遷就我多啲)!」

沈殷怡晚上回覆《蘋果》否認狂數拍檔:「就係因為拍檔咗咁多個節目,熟咗有默契先會互爆料。我同身邊好多拍檔好多節目都係咁㗎!我哋了解對方底線喺邊,冇邊個數邊個,係愛呀!」她續說:「喺節目我都話過,我當阿陳係我女朋友咁照顧,當得係女朋友就梗係有愛,有愛嘅每對小情侶都會打情罵俏㗎啦!大家太認真啦,多謝大家過去一年咁鍾意Double S,希望大家繼續支持阿沈同阿陳!」

手機用戶請按此放大圖表

娛聞樂陪你走遍全球追星,即Like「娛果」FB 專頁!
BannerBanner