直擊戲院初七重開 「餓戲」市民寧排隊填表拒用安心出行

更新時間 (HKT): 2021.02.18 18:21

香港受武漢肺炎疫情影響,政府抗疫無力,公共及娛樂設施場所被防疫措施玩殘,戲院經歷78日停業後,政府前日(16日)終宣佈有條件放寬,戲院今日重開,終於復工。顧客必須掃「安心出行」二維碼或登記資料才可入內觀看電影,而各大戲院均可索取同一張「香港戲院商會告示」的表格,讓顧客填寫資料。

《狂舞派3》及《拆彈專家2》成為華語片焦點,佔盡主要場次,戲迷早已翹首以待。《蘋果》記者今早先到屯門巴黎倫敦紐約戲院,實測闊別78日後戲院首場電影《拆彈專家2》進場狀況,之後再到旺角百老匯戲院。

巴倫紐戲院多人填表

不少「餓戲」已久的屯門市民一早搶閘買飛,加上戲院正好做40元優惠價,雖然是極早場次8時30分,也吸引幾十人入場,反應不俗,在售票處買飛時,店員會提醒顧客要申報資料。進場前必須測體溫,掃「安心」或填寫申報資料,職員聲稱如手寫資料必須填寫真實姓名、電話號碼及進場日期時間資料,並解釋:「要填寫真實資料,有機會打電話搵你。」

而填寫的資料會被投放到另一邊紙箱內。不過記者填寫資料後,簡單輕易便能進場,現場有長者笑笑口說:「求其填啦。」現場所見,使用「安心出行」App入場觀眾寥寥無幾,觀眾大多數選擇填表,由於填表人數多,少不免造成排隊等狀況。

戲院雖然有作出相應措施配合,分隔座位,但進場後見有人未有立即入場,反而向工作人員要求開大啲冷氣,而戲院亦充滿陣陣消毒藥水味,早已做好清潔措施。戲院內未見有職員帶位,可能為免人接觸,亦沒有如過往,關上影院門就開始放映。

旺角百老匯勁多人

記者之後再走訪旺角百老匯戲院,《狂舞派3》及《拆彈專家2》兩套華語片均於早上10時45分開場,10時多戲院已經人頭湧湧,入場反應熱烈,排隊買飛之餘,亦見大部份人在戲院門外填表格等入場,亦有市民即場下載「安心出行」App。

戴銅芯口罩的何先生抱怨戲院重開,新戲選擇不多,心水電影是《折彈專家2》睇華仔,問到是否「餓戲」好耐,何先生說:「咁係事實嘅,如果啱睇都會一口氣睇幾套,若果唔啱睇就唔會嘞!」講到防疫措施方面要用「安心出行」手機應用程式,何先生指早已下載:「有呀!我下載咗,作用係一個提醒。」

戲院重開後,何先生稱考慮多些去戲院:「因為網上睇,同去戲院睇係兩回事,享受去戲院睇,收工都會想睇吓電影,我哋都係戴口罩,清潔吓手,冇其他嘢可以做。」講到對戲院防疫措施會否感到放心,他無奈地說:「諗大眾只能夠接受,傳染病除咗做基本防疫,真係唔擔心得太多。」

餓戲市民攜「士啤機」

黑衫曲髮男Peter被問到這麼久沒看電影會否很期待,Peter說:「少少啦!又唔會特別期待。」他前去睇電影《狂舞派3》,講到用手機App定資料,他搖一搖頭講:「是但啦!X填啦呢啲嘢,係咪先。」

講到是否怕資料被公開,Peter坦言有兩手準備:「當然不想,就算用安心出行都係用另一部電話去download,『士啤機』去用,日後都係填form,或者舊電話啦。」

身穿灰外套的林先生早上前來看《鬼滅之刃劇場版無限列車篇》,問到為何選擇填表,為甚麼會擔心用「安心出行」應用程式,林先生表示:「因為唔透明,填資料反而唔麻煩,我唔係好熟啲電子嘢,冇下載嗰個App。」他指現時外出食飯主要叫外賣:「因為都驚疫情,盡量少啲出去食。」

問到會否覺得戲院太遲重開,林先生認為:「都會!因為疫情確診數字都差唔多,開唔開都冇分別。戲院冇必要閂,戲院有冇開,確診數字都冇咩分別,同埋冇咩邊單喺戲院爆發,我覺得戲院閂唔閂門都冇咩所謂。戲院防疫都OK,啲座位又隔開,已經好難同其他人接觸,加埋基本戴口罩,同定期消毒已經好夠,自己都會抹吓櫈。」

總統戲院僅10多人入場

下午4點幾,《蘋果》記者到銅鑼灣區戲院,見總統戲院5時許,有10數名觀眾入場,部份入場者選擇填寫個人資料,沒掃安心碼,比例約佔一半,一對年輕男女到總統戲院睇《拆彈專家2》,男士預先下載「安心出行」手機程式,女士則選擇填資料。

該名女士接受訪問時直言:「我冇裝呀!對個App冇信心,唔想裝唔係好安心。」戲院現時要事先提供資料才可進入,她覺得略感擾民:「少少啦!要嘥時間填資料。」雖然沒下載程式,但以另一方式入場也算配合措施,她說:「冇辦法,唔做又唔得,一定要嘅。」她表示入場不會太擔心,自己只是戴口罩及攜搓手液防疫。

銅鑼灣區戲院未見有太多戲迷,而買戲票的人大部份是預購場次,在總統戲院外盧小姐購買今晚7時的《拆彈專家2》,她與同行男性友人購票後,用電話下載「安心出行」程式:「我啱啱裝個App咋,頭先買飛前我問清楚係咪要裝個程式,佢哋話一定要喎。我覺得咁樣都幾唔方便,但睇個app都易控制嘅。冇法啦,真係想睇戲,本身鍾意睇戲,同埋我有睇呢套戲第1集。」她對於戲院關閉這麼久重開感無奈,但暫時買飛時見尚有很多位置選擇,「好多位揀,頭先揀附近少啲人嘅」。

麥先生為女兒增加娛樂,提早買今晚《神奇女俠1984》7時許場次,有感戲院關閉太久:「係呀!新年無戲睇,如果之後有其他戲都想再睇。」他一早已安裝「安心出行」程式,覺得入戲院前要掃條碼尚算可以。至於,可會為8歲女兒作更多防疫措施?他說:「都係戴口罩、用搓手液。」

預購7時許《拆彈專家2》的周小姐同樣事前已安裝電話程式:「本身都有裝呢個App都算ok啦!等咗睇戲好耐,對上一次幾時睇都唔記得幾耐,相信而家戲院開得都安全嘅,我都係戴口罩、用搓手液,同埋揀位側邊冇人坐嘅。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner