莊韻澄陀7個月肚出庭入稟追代言費 雙方協議和解收場

更新時間 (HKT): 2021.02.18 12:45

莊韻澄(前名莊端兒)為海鮮店「點點鮮」代言被拖數,入稟小額錢債審裁處追討,今天於西九龍法院提訊,懷孕近7個月的她腹大便便,由老公呂成忠(Joe)陪同下到達法庭。

莊韻澄今早近10時到達法庭,其丈夫Joe先行泊車,莊步入小額錢債審裁處,穿上貼身連身裙的她手拿着文件袋,心情明顯不快,她說:「我同一間海鮮公司有合約嘅,係2019年至2022年嘅代言合約,但佢哋欠我糧都一段時間,追都困難,所以入稟小額錢債。合約寫明係半年出一次糧,但因為市道唔好,協議咗逐個月畀,出咗期票。自去年11月到而家2月都彈票,佢哋開頭都仲有回覆,之後已經冇覆,已讀不回,而家先追咗彈票嗰兩個月先,可能之後要繼續追近兩個月。已經4個月,冇辦法下先入稟,我第一次要咁樣追一間公司,我覺得做藝人真係冇乜保障。」

問到陀着BB,又要在新年期間追數,怕不怕動胎氣?莊韻澄說:「而家個肚都比較重,已經有5磅半,預產期4月,可能會提早。都有影響心情唔開心,冇人想面對,追方或欠方都冇人想咁樣去處理一件事,冇人想畀人欠薪酬,希望佢哋肯傾肯和解。之前去傾分12個月出嘅時候,已經好難約到佢哋,我要做嘅嘢都做晒,但都得唔到應該有嘅薪酬。」莊又指老公一直在身邊支持:「佢都好擔心,佢一路有陪住,同埋睇吓點解決,有約對方,但都唔成功,最後先揀入稟。」

莊韻澄逗留3小時後步出法院,她說:「兩方面都進入和解程序,和解唔到先會有下一庭。我覺得好嚟好去,雙方意願都唔想不停咁面對訴訟,因為之前一直溝通唔到,唯有搵呢啲辦法。我諗合約都會終止,大家要傾,係雙方都公道嘅。」她又謂在傾談間頻頻人有三急要如廁,她說:「都OK嘅,希望今次可以私下解法,唔使9個月嚟一次,坐完月都要嚟。」而她又指一直有經理人跟進工作進度,不過合作最主要是溝通。

莊韻澄下午離開法院,她表示事件最終和解,她說︰「我哋雙方都傾好咗和解嘅嘢,可能要再約出嚟簽返份嘢畀對方,最後都和平咁解決成件事,內容大家都協議咗保密,都係一個好嘅結果,唔使再咁操勞去面對上庭。」

申索編號︰SCTC039101/20

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner