吳若希懶理星夢恩公何哲圖落難 自嘲「豬乸命」批事業運恨做一姐

更新時間 (HKT): 2021.02.19 14:06

曾志偉返TVB升呢做副總經理擔大旗,負責綜藝﹑音樂節目及製作,死敵余詠珊只是助理總經理,瞬間失勢,被踢出綜藝科,她老公何哲圖被踢出TVB附屬唱片公司星夢娛樂,將於今個月28日離任,向外闖發展其個人音樂事業,由何哲圖一手招攬嘅吳若希、菊梓喬、周柏豪、胡鴻鈞、譚嘉儀及鄭俊弘等,當初以為有靠山,時移勢易隨時變「孤兒仔」。

星夢「恩公」何哲圖落難,被迫開新公司另起爐灶,大難當前,各家自掃門前雪,吳若希一於懶理昨日在YouTube上載影片講明恨做「一姐」,而玄學家陳果齊兒子陳定幫為吳若希預測運程,被批這一年工作容易有轉變,稱她要轉工或轉公司,未知是否暗示她最好跟「恩公」何哲圖共同進退?

何哲圖於2013年把「星煥娛樂」變為「星夢娛樂」,成為TVB附屬唱片公司,壟斷所有無綫劇集歌曲,又霸佔TVB音樂節目安排心腹有份主持同唱歌,最離譜是《勁歌金曲頒獎禮》由星夢歌手做大贏家,得獎歌手上台攞獎都多謝Herman,難怪新官上場要改革。

搶做一姐「無懼世事變改」

吳若希近年一直被「星夢一姐」菊梓喬壓住,眼見「恩公」何哲圖敗走,吳若希當然發揮「無懼世事變改」的精神,陳定幫在節目中指吳若希桃花多,為圈中奇葩屬於「有名有利」的命格,吳若希亦自言21歲入行所有事都順風順水,在片中陳定幫都講明吳若希今年工作上容易有轉變,可能會轉工。

吳若希呆一呆,陳定幫補充:「轉公司。我唔知你要點樣轉,不過就意味指工作上有轉變,會有一個幾好嘅效果,而且幾爆。」吳若希就單刀直入問事業狀況:「講咗咁多年,其實我有冇機會做一姐。」陳定幫未有正面回答:「一姐呢家嘢,就真係…」吳若希即大叫:「喂呀!『典解』你咁嘅反應嘅!即係我做唔到一姐啦,我係唔係做唔到一姐呀?」陳定幫無奈地說:「睇吓你同邊個比,你喺屋企都係一姐。」

吳若希鍥而不捨繼續追問下,陳定幫尷尬說:「咁又唔係。應該話你可以做,不過就唔好故意去爭,會舒服好多,如果你刻意爭就會有反效果。」吳若希馬上說太好,因為她心態上一直沒想過去爭。

未來10年易肥

此外,陳定幫又指吳若希未來10年大運:「懶!這10年容易肥,真的個人會越嚟越懶,而且會有少少『褶褶地』嘅現象,自己獨處,唔係好願去見新朋友。頭嗰5年未得住,但後嗰5年就可以䟴䟴腳,同埋個人會越嚟越鍾意舒服、變懶、吃喝玩樂,你會將好多心機放喺屋企,你命格子女宮都旺。」吳若希承認最近不太愛外出,不過陳師傅指她這10年會有許多貴人,其實她應該去多認識新朋友,吳若希搞笑叫師傅介紹朋友給她。

叫老公結紮:生到驚

之後吳若希無厘頭問:「點解有啲人會講生完,小朋友會吸咗父母嘅運氣?」陳師傅一臉愕然:「當然唔會,嗰啲人都亂噏。」講到吳若希至少可以生3個或以上,吳若希自嘲是「豬乸命」,離奇提議老公做結紮手術,更問「明唔明咩都生到驚」。

講到佢同老公嘅愛情運,陳定幫話:「你會好睇佢唔順眼,其實又冇咩嘢,佢會就你。今年會有啲嘢好火,甚至指罵佢。」吳若希問佢會唔會有第二個,陳定幫:「唔會。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner