細細粒自爆零拍拖經驗 受身形影響對愛情冇幻想

更新時間 (HKT): 2021.02.20 13:34
(資料圖片)

現年36歲的陳嘉佳(小寶)以肥成名,近年轉戰大陸市場,每晚在網上做直播推銷食品,又不斷試食,累積超過40萬fans,成功吸金。日前細細粒接受商台《1圈圈 星光背後》訪問,雖然重230磅、「圓碌碌」身形的細細粒甚受fans歡迎,不過小時候亦因為這身形而受到欺凌:「我細個已經係肥,小學五年班已經有165磅,超晒標,可能我似爸爸嗰邊啲屋企人,阿媽話出世嗰陣阿婆已經話:『呢個細路啲皮好鬆,好有發展空間』,去到6個月人哋仲食糊、飲奶,我已經係食粥。」

細細粒坦言從小到大都很喜歡吃東西:「試過一次真係好變態,阿爸阿媽飛咗返上海,擺低咗2個禮拜嘅生活費畀我,我第一晚已經叫晒自己鍾意食嘅嘢返嚟。我都有試過減肥,但係夜晚發夢會夢見自己喺超級市場,仲要得我一個人,係咁食晒入面啲嘢食!」細細粒還說小學已經受到同學欺凌,到了中學時期,情況更加嚴重:「小學嗰陣唔會有人主動同我玩集體活動,次次要老師安排;去到中學仲會有啲好難聽嘅花名,好似『肥婆奶奶』、『恐龍嚟喇』,甚至試過做gym都會畀人話係『恐龍』。」不過細細粒未有感到不開心:「都習慣咗,可能我面皮太厚。」

相士批姻緣運極差

雖然今年屬牛的人桃花運會不俗,不過細細粒說:「男人對我嘅身形一定有標籤,佢哋望女人第一眼邊會睇到你嘅內心?一定係睇外表,咁講外表我一定輸晒。我都搵過相士睇過姻緣,睇10個有9個都係話我嘅姻緣運極差。」問到有否試過對異性有好感?小寶笑說:「一定有喇,嗰陣我好鍾意佢,周圍搭通天地線,打聽吓佢會喺邊度食飯,之後扮偶遇,但係都冇用,人哋當你係朋友,咁可以點啫!不過我一定唔會主動示愛,我鍾意一個人係會好明顯,記得晒人哋啲喜好,如果對方都冇回覆我,你係知道一定冇機會。」

對於姻緣,連拖手仔都未試過的小寶直言一早認命:「呢個幻想由18歲開始到而家都做唔到,我唔會諗呢啲,亦都冇晒幻想,明知機會率都唔會有,我要搵過年紀大過我嘅人,但係啱條件好多都有老婆,冇理由走埋去做第三者,所以真係好尷尬。」主持又問到擇偶條件,細細粒說:「就算結過婚有小朋友都冇問題,最緊要識嗰陣係單身,唔使話要好有錢,搵錢多我少少就得!如果真係有呢個人『盲樁樁,樁埋嚟』,你都咪使旨意走,我一定捉住唔放。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner