邵仲衡做膳心小館一日店長 盡責任報行蹤:道都可以高一丈

更新時間 (HKT): 2021.02.20 17:37

邵仲衡(大佬孝)與歌手兼排舞師王漢勛(Dave)今日到將軍澳的「膳心小館」擔任一日店長。大佬孝謂「膳心」是少數成功又做得好的香港製造社企,問他有否想過加盟或再開展生意?他說:「唔好加盟嘞,老闆要幫手咪盡量幫手,你知而家香港嘅情況幾咁『前途光明』㗎啦,好多嘢瞬息萬變㗎嘛,就好似臨老先睇吓點去適應環境,而家環境幾咁液態化,生意就唔想做嘞,有意義嘅嘢一定唔托手踭。」

提到瞬息萬變的社會,最近千方百計要求市民使用安心出行程式,引來迴響,大佬孝說:「我又唔係咁反對,如果經過好多IT專業分析過係好多漏洞嘅,香港嘅情況睇,你自己覺得有問題就應該知道點做,呢個都係一個市民責任嚟。如果有人心懷不軌,點都避唔到,正所謂道高一尺,魔高一丈,掉轉頭魔高一尺,道都可以高一丈。我自己有裝,至於點樣裝,而家都有好多方式,本身我又好鍾意睇戲,做吓呢啲都好緊要,喺一個空間密閉,幾百人坐喺度兩粒鐘,市民都應該做嘅。」

至於會否打疫苗?大佬孝則有所分享:「呢方面我有啲經驗,喺英國嘅媽咪都打咗,佢係第一批打嘅,而家第2針都打咗,佢超過80歲嘅,係打輝瑞,佢身體都冇乜特別反應嘅話,我諗我都冇啩,我會接種。」衞生署今日凌晨出稿,指科學委員會提到現階段的疫苗接種計劃,短期內未能達到群體保護。

剛忙完新片《正義迴廊》拍攝,大佬孝正開工拍攝馬來西亞電視台Astro跟香港電視台合作的一部連續劇,對手包括「鬼王」潘紹聰,檔期已排到年尾,新一年有好開始:「我真係好感恩,有幾多我喜歡嘅project搵我,盡量做囉,你知而家香港環境幾咁有趣,又有英明領導帶領我哋,過關斬將呀嘛!柳暗花明又一村呀,哈哈哈!」

下星期三(24日)是大佬孝的57歲生日,他現場獲粉絲送上一幅親手畫的頭像畫作禮物,大佬孝笑言不想再提生日,因為又老一歲,問他生日願望,他說:「希望可以早啲通關,大家困咗成年好悶呀!」

Dave撐城嫂熱心跳舞

另外,Dave跟此店甚有淵緣,大家經常合作,他更被膳心小館的善心打動。Dave是城嫂方媛的排舞師,早前方媛的舞技被網友勁彈,指她四肢不協調,Dave卻為對方抱不平:「佢真係一個好勤力嘅女仔,佢啲跳舞片畀人衝擊得好緊要,我成日覺得係為鬧而鬧。佢因為要照顧屋企,唔係上得多堂,一星期只係一、兩堂,佢練到完整嘅舞步已經好犀利,佢係勁有心嘅,跳到連腰都痛,希望大家多啲鼓勵佢。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner