陳靜拍新戲每次埋位被虐打 洪天明每日花3小時化爛面妝

更新時間 (HKT): 2021.02.21 15:25
陳靜和洪天明合作新戲。

由羅守耀投資兼執導的懸疑電影《被消失的凶案》,今日於荃灣舉行開鏡拜神儀式,出席演員包括洪天明、陳靜(DaDa)、任達華、邵美琪(Maggie)、張兆輝、林雪、車婉婉及何華超等。洪天明在戲中飾演爛面並且患有嚴重類風濕關節炎及濕疹的角色,與同住劏房、每日被丈夫虐打的陳靜(DaDa)培養出感情。

DaDa在戲中被飾演其丈夫的何華超虐打,DaDa說︰「每場戲都畀人打,有啲畫面係要真打,自己成日都做一啲好慘嘅角色。今次同洪天明一齊去探訪類風濕病患者,了解佢哋嘅苦況。」洪天明飾演爛面角色,每日都要花2、3小時化妝,天明表示自己本身皮膚容易敏感,所以都要小心處理。他透露與DaDa入行時已認識,但今次是首次合作,對於二人有否親熱戲,天明笑言︰「原本有,但係老婆反對。」

此外,對於曾志偉重返無綫任高層,天明說︰「志偉宣佈嘅前一日有同我哋講,如果適合我哋就會返去幫手,我離開咗TVB大概2、3年,但志偉叫到,兄弟姊妹一定會一齊返去幫手。」天明早前離港8個月工作,最近才返港,他說︰「最近幫爸爸(洪金寶)設計一個洪家班品牌,有啲係醫藥產品。」

而任達華與邵美琪是經典電影《PTU》系列拍檔,今次再飾演警察,任達華回想2003年開拍《PTU》時,一拍便3年,他說︰「當時杜琪峯嫌Maggie肥得豐滿,唔連戲,要佢返去10日唔准食飯,我哋就停工等佢。」邵美琪說︰「嗰陣真係唔識要顧及連戲,之後當然要聽話去做。」

現年65歲的任達華表示,1976年他入行飾演CID警察,今年再飾演警察,感受很深。張兆輝今次因為演老差骨角色要增磅,他說︰「畀老婆話我而家肥到似咩!導演要我肥,但老婆就想我瘦,我只能夠話角色需要,會就住肥。」張兆輝早前拍攝一場開槍戲份,因反應彈太近耳朵,槍聲令其耳朵受傷,張兆輝說︰「 頭幾日感到個頭赤痛,出現耳鳴,而家好番,有今次經驗,下次都會帶耳塞保護。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner