鍾培生寸林作撕「百萬林鍾一戰」合約嘥時間 網民罵爆:一早夾定

更新時間 (HKT): 2021.02.22 13:35

「百萬林鍾一戰」,這場二世祖決戰使網上花生指數急升,林作日前揚言絕不龜縮,接受鍾培生嘅百萬隻揪擂台戰,現時需要時間研究拳賽規則,當問及拎到100萬會點用,林作自言要加重份人壽,留畀愛佢嘅人,又稱女友裕美鼎力支持他應戰,「想我畀人打,佢話最重要唔好打死」。

今日11點幾左右,鍾培生正式發出合約,在社交網tag林作叫佢「收嘢」,未幾林作指已列印出嚟,喺IG上載影片指呢份生死約僅得兩頁紙,「咩鬼律師寫嘅爛鬼拳擊賽事舉辦的合約?0分重作」。

林作喺片中扮認真睇條文:「各位呢一份係鍾培生先生send畀我嘅拳擊賽事舉辦合約,兩頁紙都唔知係咩律師寫,中文合約,我都未簽過!咁嘅垃圾都send畀我。」林作即場撕合約,叫鍾培生親自同佢洽談。鍾培生亦轉貼林作影片兼回覆:「除咗生死狀同埋出場費唔改得,有咩可以配合你。」

對於林作撕爛生死約一事,鍾培生今日回覆《蘋果》:「唔傾,唔嘥時間,唔打由佢!」而林作回覆《蘋果》時則反駁:「啲條款垃圾,寫得太業餘,唔夠全面,包括我打瓜佢點算?呢啲都未講,得兩頁紙,咁就叫簽份合約呀!」

裕美叫林作加保:受益人寫我

林作女友裕美明知鍾培生實力較強,竟然非常支持林作出戰拳賽:「我好支持,非常支持,因為我好想打佢好耐,當波打。有人幫我打非常好,佢唔夠人打唔緊要,佢預咗唔夠人打,以一個公道說話,我覺得鍾生會贏,但係我想睇到阿作畀人打。」

裕美擺明手指拗出唔拗入,她坦言:「點解我想打佢,因為佢個樣想撩打。」問到可否擔心林作受傷?裕美續說:「我會叫佢加重保險到1000萬,然後受益人寫我個名。我驚保險公司唔受佢保險,因為而家知佢去打,如果佢塊面傷咗,咪乘機整埋容,幾好呀!而家全世界嘅人都想打佢,佢而家為香港人着想,為香港捐軀。」

林母撐仔上擂台拎100萬

最離奇係林母Lily都盲撐囝囝,今日接受《蘋果》訪問時表示:「我支持佢挑戰鍾生,我個仔一向對自己都好有自信。」不過Lily希望有時間畀林作備戰:「佢為咗1百萬必須要秘密練兵半年。機會係畀有準備嘅人,等佢哋搞掂就上。」

呢場口水前哨戰嘈咗幾日,都係雷聲大雨點小,林作更多次以「小學雞」方式拍片還擊、出post隔空口沫橫飛,又自薦叫TVB買直播,此舉惹來部份網民相當反感,今日陸續有網民出post鬧爆:「林作同鍾培生根本就係一早夾定,兩個夾定互相網上引戰,話擂台上一決高下,不斷整話題出嚟,根本就係免費宣傳谷人氣。如果唔係邊有人理嗰兩個有錢仔?」

愛出風頭索「火水」

其實「百萬林鍾一戰」,事緣林作一向來愛出風頭,早前在鍾培生嘅專訪下面留言指對方「抄我100萬?」,抽水索着「火水」,有傳鍾培生不滿畀林作抽水,向林作宣戰在擂台隻揪,鍾培生向林作下戰書,而連登網民起初都期待「林鍾之戰」,開出「鍾培生勝1賠1.2、林作勝1賠3、兩條xx吹水打唔成1賠1.4」嘅賠率,引來城中熱話,網民均睇好鍾培生,認為林作唔夠膽出戰,但林作講明冇想過龜縮,今日卻撕「百萬林鍾一戰」合約,結果被對手鬧佢嘥時間。

學張家輝喺《激戰》話齋「怯你就輸成世」,搞咗咁大場大龍鳳出嚟,唔知呢兩個富家子決定點樣為呢場「林鍾一戰」埋尾呢!?

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner