狗仔出更丨肥仔聰年前約見吳孟達 中氣十足仍愛睇賽馬:只係瘦咗

更新時間 (HKT): 2021.02.23 00:30
林子聰一家四口去公園玩。

在周星馳電影《少林足球》中飾演六師弟「輕功水上飄」的林子聰(肥仔聰),近年專注在大陸拍戲,多年來《少》片一班師兄弟感情要好,不時有聯絡。昨日《蘋果》在數碼港遇到肥仔聰帶同老婆及一對子女來公園玩,記者上前問他有否聯絡近日因肝癌入院的吳孟達(達哥)?肥仔聰表示想去探望對方,可是達哥沒有回覆,估計達哥不想大家打擾。

昨日黃昏約5時,《蘋果》在數碼港見到肥仔聰一家四口,同行還有兩名外傭,小朋友還帶備單車到來。疫情下小朋友難得出來走動「放電」,玩得十分開心,其間5歲大兒子踩單車時,不小心跌低,肥仔聰見狀不太緊張,只走埋兒子身邊了解,而兒子亦好堅強沒有喊,只展示雙手給爸爸看有沒有擦傷。

之後,肥仔聰和太太「賣甩」一對子女,兩公婆拍住拖在公園內行圈當運動。行開一陣,兩歲女兒以嬌嗲聲音叫喚爸爸,肥仔聰即轉身行去女兒方向,當囡囡見到爸爸即撲上前扭抱,十分可愛,而踩住單車的哥哥見狀,立即踩住單車飛奔過來爭寵,場面十分溫馨。之後記者上前問肥仔聰,是否趁天氣好帶小朋友出來玩?他說︰「係呀!因為就嚟又要返上去(指大陸)開工。」

提及近日因患肝癌入院的吳孟達,肥仔聰說︰「我哋知道,但佢都冇覆我哋,冇講咩事入院。」談到近年吳孟達屢傳身體欠佳,問他有否聯絡?他說︰「之前一路都有,直至佢今次治療就冇,佢自己唔聯絡我哋。」肥仔聰表示早年曾見過達哥,對方當時的確瘦了好多,但仍中氣十足,他說︰「之前喺大陸,佢仲係咁問我邊度睇到賽馬直播,佢興致都幾好,只係瘦咗。(佢有冇戒煙酒?)佢戒咗都幾年,只係戒唔到咖啡,之前佢飲咖啡都好犀利。」談到一班師兄弟會否去探望他?肥仔聰說︰「而家都想去,不過佢可能唔想大家打擾佢,大約一年前佢主動聯絡過我哋之後,就再冇啦!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner