保錡@ERROR怕累及兄弟 宣佈暫別:係一個應有嘅懲罰

更新時間 (HKT): 2021.02.23 23:34

新增回應

ViuTV首屆《全民造星》「出產」的組合ERROR成員吳保錡,早前被揭暗交「性感女神」張沛樂(沙律),被揭疑背正式模特兒女友Carrie偷食沙律,負心漢形象一發不可收拾。怎料他日前開直播時被網民嘲他是「少年八両金」,保錡不忿,爆粗反擊,令他的形象插水。有網民發起「ERROR走保錡」及「全民踢保」行動,希望不要讓保錡成為害群之馬,影響ERROR以至MIRROR的發展。

承認直播中爆粗唔啱

保錡今晚在IG貼文,他指知道近日隊友受自己的是非影響,每做訪問都被問及自己的事,他自覺影響範圍甚廣:「反思咗好多晚,雖然我講咗好多次會重新出發,但覺得依然欠大家一個交代。我意識到一方面我之前處理感情嘅事做得唔好,另一方面,當晚直播嘅言行舉止係好唔啱,說話亦無尊重過人。呢啲全部都係我嘅過失,我要面對自己嘅錯,出嚟同大家再次道歉。」

保錡稱以前一睇到有人抨擊自己就會嬲,但近日再睇相關留言,會覺得內疚,因為自己的錯而連累其他人,所以他作出決定:「喺完成手頭上已開始嘅工作之後,所有工作將會暫停。我亦唔會參與任何節目及ERROR歌曲嘅宣傳。我認為咁樣係一個對我應有嘅懲罰,希望唔好累到其他兄弟,亦唔好因為我嘅關係而抹殺咗所有人嘅心血。」

自認毫無分寸

保錡在文中提到同隊的3位兄弟「肥仔」梁業、何啟華(Dee哥)及郭嘉駿(193)對自己的幫助及鼓勵,保錡在文尾再次致歉,並指:「我知道保錡係大家眼中係一個毫無分寸嘅人,但希望下次大家再見到我嘅時候,會見到一個懂得尊重、願意承擔責任嘅人。我希望用行動證明。」

Dee哥今晚在社交平台轉發保錡的post,並留言:「保錡大個仔,越嚟越立體。」又不忘落「ERROR四位一體」的tag,似乎保錡甚獲隊友支持。

經理人尊重決定

《造星》監製黃慧君(花姐)表示尊重保錡的決定:「尊重保錡決定,畀啲時間佢沉澱,知道佢今次好內疚,覺得佢上了人生一課,我有信心保錡再見大家的時候會變得更好更成熟,期待再見到ERROR 4子嘅畫面。」

至於ERROR經理人阿濟回覆《蘋果》稱,ERROR現時負責節目有《口罩小姐》、《ERROR自肥企劃》,以及其他一些節目,差不多已完成拍攝,並說:「呢個(暫別)係保錡自己決定,佢事前都有同公司傾,我哋都有開解佢。(何時再合體?)呢個到時再睇吓點。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner