莉莉菇對媽咪鍾慧冰心存愧疚 感激契媽大姐明照顧病母:冇佢可能會冇我

更新時間 (HKT): 2021.02.23 06:00

外號「莉莉菇」的生活科技資訊網站女記者林靜莉(Jeannie)最近在網絡世界討論聲不絕,不過原來今年踏入25歲的她,是1979年港姐季軍鍾慧冰獨生女。

Jeannie在單親家庭長大,一直跟媽咪鍾慧冰生活,她指人生中有3個很重要的女人,她說:「第一個係毛舜筠,佢做戲好好,係我演戲上嘅一個榜樣;第二個係契媽林建明,冇佢可能會冇我,因為媽咪係高齡產婦,有咗我之後,媽咪有產前抑鬱,契媽話:『我上契,如果你養唔起就我養!』前幾年媽咪大病,契媽係會幫媽咪剪指甲、腳甲,我覺得要有一個好深厚嘅感情先會做到,所以我好多謝佢。」

珍惜眼前人

最重要的女人中,當然少不了媽咪,不過Jeannie對媽咪總帶點一份愧疚。鍾慧冰在2016年底因免疫系統問題患上脈管炎,當時曾擔心因癱瘓連累家人而想過輕生,Jeannie坦言當時很害怕,「我由細到大冇乜經歷過生老病死嘅階段,當媽咪有大病,我係不知所措,唔知點算好。因為媽咪本身係好樂觀嘅人,佢因為個病而變得情緒好低落,我唔知點幫佢,經濟上我幫唔到手,實際上我又唔係醫生。媽咪到而家都未好返,當時我住宿舍,好少返屋企,但佢有呢個病,我覺得要珍惜眼前人。」

母女的裂痕

鍾慧冰曾經講過嬲Jeannie沒有去探她,Jeannie帶點激動說:「其實我唔知咁嚴重,我確實係有做錯,我要多啲關懷媽咪,我知唔可以攞嚟做藉口…當時我有舞台劇喺身…我覺得屋企人係最重要。其實媽咪冇好同我講佢發生咩事,大家都唔知咁嚴重,我見到有其他人陪佢,我冇諗過唔陪,只係諗住第二朝先探佢,但病人嘅心態係好需要第一時間畀support,我都覺得自己太遲,我好內疚。之後都有同媽咪道歉,我知道當時嘅傷害係冇辦法挽救,我而家會好努力去補償返。」

父母離婚大家順心

Jeannie指媽咪為人很開通,會經常分享感情事,更被媽咪笑她17歲才初戀。不過媽咪的失敗婚姻,令Jeannie缺乏一份安全感,「對愛情、婚姻,我始終都會追求,都會渴望,但點都係冇安全感。我4、5歲嘅時候,已經feel到媽咪同爹哋關係唔好,我好清楚佢哋想營造婚姻美滿嘅感覺畀我,希望我有一個好好嘅童年,但我覺得唔需要。記得有次佢哋鬧交,我直程同媽咪講『如果關係唔好,不如分開啦,唔使為咗我而繼續一齊』,佢哋咁樣唔會令我開心。而家分開咗,但佢哋畀我嘅愛唔會少咗,爹哋係一個好爸爸,但唔係一個好丈夫,我有嬲過佢,但佢喺我心目中…一定係我嘅爸爸,我同佢都有聯絡。」曾經拍過3次拖的Jeannie,現時屬單身一族,她希望能夠找到專一愛她,但又不愛女仔黐身的男士。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner