林鍾一戰丨林作秘密練拳繼續囂張 挑機鍾培生:個樣抵打就要打

更新時間 (HKT): 2021.02.23 15:19

現年30歲富三代鍾培生向31歲林作下戰書,挑機來場「林鍾擂台戰」,不過2人口水戰持續幾日還未有落實行動,昨日林作拍片撕毀鍾培生邀請合約,嫌棄對方無誠意。今日林作突然積極到灣仔拳館踩場,表示要向拳館教練向柏榮拜師學藝,一身斯文look在擂台上示範拳術,但顯得hea而無力。林作有自知之明:「透過朋友介紹,今日嚟上堂,問吓師傅教我點做,我十幾年前曾經學過泰拳。」雖然撕毀合約,但他卻堅稱會上陣迎戰:「好難唔打,100萬唔係個個有咁嘅機會,亦代表市民多謝佢。」

林作囂張解釋怒撕合約:「太弱太渣,要詳細少少,我哋兩位當事人傾就未必要見面,但講到要簽約就要當面見面,等佢再安排,我大律師畀啲意見佢。」並表示自己有誠意接受挑戰,非裝模作樣,故才來學打拳:「學吓點打佢。」

鍾培生過往有打拳戰績,林作說:「冇睇過佢啲片,只係睇過相,個樣抵打就要打。」又謂信心十足。就連女友裕美都剝花生,想睇林作被打,他笑說:「係呀佢都想,因為我哋兩個關係有時唔係太好,有時佢對我充滿怨恨,想借助其他人嘅手出一口氣。」而林母亦拍片力撐他出戰:「係呀,全城都想食花生,冇人對我好。」

林作現時積極備戰,至於幾時開戰?他則說:「要睇場地、時間、人數等等,為公平起見大家都要備戰,我要同師傅傾吓,可能4個月左右,但如果師傅話我操一星期就得,咁咪一星期後打囉,可能我骨骼驚奇呢。」之後被人糾正「骨格精奇」才對。雖然林作口口聲聲表示會應戰,不過網民卻揶揄林鍾擂台戰乃吹水戰,林作堅定不移說:「好多打拳前哨都有口水戰,唔代表唔打,只會打得更甘,打硬,希望市民有啲耐性,唔好急。唔打好難同香港人交代,打鑊佢,打贏佢,代表對權貴階層出一口氣。」

而網民連日將林作和鍾培生的學歷、財力、家庭背景等比較,林作說:「我覺得我今次代表宅男同普通人家,喺佢眼中我哋全部都係普通人,我背負香港幾百萬人嘅希望,我會加倍努力,希望畀到機會我發達,個個唔睇好我,如果我贏咗就真係大跌眼鏡,而家嘅賠率等同買港紙賠美金。」未正式開戰,網民除了食花生外,更覺得兩名富二代自我宣傳,林作否認:「我只係喺一個慈善活動見過對方,握過手打過招呼,有一面之緣,之後完全冇聯絡,呢單嘢亦都冇傾過偈,係幾偶然情況,我都有鋪癮去啲媒體及網度留言,講到100萬就扯起佢把火,佢就邀戰,我唔可以龜縮,絕對冇炒作成份,亦都冇動機咁做,係為咗100萬。」現時主要等對方安排合約。拳腳無眼,但林作不擔心損傷:「平時屋企同美美打交損傷大啲,基本功我係有,但上擂台就未試過。」

據知今次林作上拳館,是對手鍾培生介紹作支援訓練,鍾表示希望林作可以在台上有好表現,不想以一面倒之勢勝出。原本他想拒絕介紹,但認同雙方實力差距太大絕非武術精神,所以最後亦同意為林作安排訓練。初步估計林作的訓練為期達6個月,而針對性訓練費用超過10萬元,費用由拳館方面負責。

此外,前女友麥明詩看到林鍾擂台戰新聞後,在網上發表叫二人不要再公開講女性性器官,林作即收斂說:「我冇咩個別評論,全城都抽緊水啦,冇咩睇法。」今日麥明詩在IG貼了一張黑白相,並以英語留言:「我們是否願意承擔平等的責任感,是否為爭取平等權利而鬥爭?」似再度為女權發聲。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner