曾志偉搵何麗全接管音樂部 受政府支持撐起樂壇:無得退縮

更新時間 (HKT): 2021.02.24 17:43

曾志偉日前加入TVB擔任副總經理,踢走何哲圖掌管音樂事務,有指其首要任務便是與三大唱片公司「破冰」,更盛傳三大唱片的歌手有機會重踏大台舞台。今日由國際唱片業協會(ifpi)香港會主辦、政府「創意香港」贊助、香港音樂聯盟及香港音樂出版人協會全力支持的「音樂永續 樂壇同享」記者會,由大台幫手宣傳。

今日記招中,三大唱片的環球唱片、Sony Music及華納唱片除了派高層出席外,亦派出旗下歌手出席支持,包括環球的Gin Lee、AGA、陳凱詠;Sony的林奕匡和葉巧琳及華納的林欣彤,其他歌手還包括星夢的周柏豪、吳若希、菊梓喬、JW王灝兒,以及其他唱片公司的鄭俊弘、何雁詩、糖妹、敖嘉年、黃翊、露雲娜、李日朗、歐信希等,雖然現場逾百名業界人士,但卻缺乏巨星撐場,連志偉的老死、身為環球歌手的譚詠麟都缺席,令記者會變得雷聲大雨點小。

嘆樂壇受疫情影響

曾志偉上台致辭時,首先多謝業界及新聞界的支持:「今日其實係非常之有意義,因為ifpi咁有心,而家因為呢個疫情,各行各業咁艱難嘅時候,我哋能夠得到政府嘅支持,能夠為咁多嘅歌手、同業、咁多嘅好歌,重新再新編而再演繹,同我哋所有嘅香港市民共享好嘅音樂係非常之難得。作為我哋香港嘅電視台,我哋一定要全力支持,呢個係我哋冇得退縮,我希望經過今次嘅支持,我哋更多嘅音樂、更多嘅歌手能夠喺我哋唔同嘅節目裏面出現。」

提到樂壇去年受武漢肺炎影響,大小活動演出被迫取消,志偉說:「今次呢個疫情,其實大家都艱難,演唱會做唔到啦、登台冇啦,或者連一啲商場嘅小活動都可以話係少之又少,所以喺各行都辛苦嘅時間裏面,呢一個行動可以話係,除咗係一個就業機會,最緊要係一個大家忍咗好耐發放正能量嘅時候,又將我哋嘅音樂重新出發,所以今次嘅意義係非常之重大,我希望喺我哋TVB嘅所有媒體,包括翡翠台、J2、myTV SUPER,任何OTT嘅官網平台,全部都盡量去推廣,更加希望在座所有歌手,都能夠上我哋嘅音樂節目,演繹你哋嘅歌曲,OK?」在場人士鼓掌以示支持。

志偉臨尾還補充:「呢個只係一個開始,希望經過今日,我哋TVB能夠同我哋所有嘅同業、所有嘅唱片公司,我哋同心協力,再一次重新出發,推動我哋嘅樂壇,令我哋嘅樂壇百花齊放,好唔好呀?」

何麗全以「新人」回歸

曾任大台高層的何麗全在2011年離巢後,先後加入nowTV及亞視,今日他正式「回歸」,並獲委任掌管音樂部門,志偉在台上以「樂壇新人」來介紹何麗全,何麗全上台時表示:「企喺個台度好驚,因為十幾年冇企喺個台度,真係好驚!但亦都好開心嘅,今日我同好多我哋嘅唱片界友好傾吓,好多回復返當年我哋做頒獎禮咁,唱片公司同歌星嚟支持我哋。我同曾副總經理已經傾咗,佢畀我嘅第一個任務係一定要將音樂回歸樂壇,音樂唔係屬於TVB或各大傳播媒介,係屬於樂壇嘅,我哋希望今日之後將所有音樂回歸樂壇,希望可以百花齊放。」

而他又以有唱片公司高層因為「重返」大台唔認得路做例,邀請歌手們多參與大台節目:「我好希望今日之後,佢哋以後多啲入嚟我哋相聚一下,同啲同事傾吓,希望多啲歌星可以參與,尤其係一啲好耐冇喺我哋平台出現嘅,今日之後,盡量多啲喺我哋嘅平台出現,令到樂壇恢復生機。」

由於何哲圖之前除掌管音樂部外,亦是星夢的主腦人物,今日志偉在記招中強調:「星夢嘅歌星仍然成日都會上㗎!不過你哋更多機會同唔同嘅歌手crossover一齊唱,更多嘅好歌。」

將邀大陸歌手合作

志偉在活動後被問到星夢由誰接管,他直指何麗全,更笑言「盡量改動少,找一個姓何的來做,比較適合。」他指何麗全與各大唱片公司都熟悉、關係友好,而且具經驗,認為何麗全定必勝任幫到星夢所有歌手。而何麗全已與星夢歌手傾過未來方向,他們都樂意在其他平台現身,也想試唱其他歌曲,及與其他唱片公司的歌手合作,志偉直指何麗全絕對幫到手。

何麗全稱目前最主要的工作是重新聯絡所有唱片公司,部份已有十幾年冇合作,他希望可以讓歌手們可以重歸大台。對於將來會否邀請大陸歌手合作,志偉坦言只要同音樂有關都可以,他又指音樂是世界性的,歌手應該作多方面發展,不應該局限自己。

至於志偉會否重做《獎門人》或找回班底合作綜藝節目,志偉稱相信班「長老」會重現大台,但相信暫時不會有《獎門人》,因為現時需要學習很多行政上的工作,所以他傾向先把公司的事情處理好,再想其他事。他又笑言,因為現時很多時要早起上班,碰巧有幾次要開會,只睡3小時便要上班,他都掩不住疲倦,直嗌「頂唔順」,所以現時會避免食飯聚會,或安排在星期六、日,較少機會要開會。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner