周柏豪吳若希如赴「刑場」等候發落 曾志偉笑晒向星夢派定心丸

更新時間 (HKT): 2021.02.24 18:05

新官上任三把火,TVB副總經理曾志偉一上場,先臨陣煞停死敵余詠珊的《聲夢傳奇》,之後又踢走掌管音樂事務的何哲圖,扶好友何麗全手執大權,成為星夢行政總裁,今日更高調聯同四大唱片公司正式破冰,聯手舉行《音樂永續 樂壇共享》記者會。

星夢「恩公」何哲圖落難,一眾星夢旗下的「前朝遺臣」周柏豪、吳若希及菊梓喬等今日出席記招,恍如赴「刑場」等候發落,話晒以前星夢娛樂是余詠珊老公地盤,現時簽約星夢娛樂的歌手,若被發配邊疆就隨時冇運行,地位岌岌可危

今日曾志偉介紹何麗全上台講大台音樂平台以後的發展時,何麗全講笑叫曾志偉做「曾總」,何麗全說:「希望多啲歌星參與,有啲好耐都冇喺我哋台出現。」曾志偉就忽然向星夢歌手派定心丸:「星夢嘅歌手仍然都會上嚟。」

菊梓喬失靠山不擔心

周柏豪、吳若希及菊梓喬受訪時,稱何哲圖離任有通知他們,周柏豪稱TVB是上市公司,大公司出現人事變動,他們只會做好自己本份,周柏豪也贊成TVB跟三大唱片公司破冰,將來百花齊放,對歌手及觀眾均是好事,菊梓喬則否認何哲圖離職頓時失靠山,指自己期待未來發展,不會覺得擔心。

他們承認之前已跟何麗全及樂易玲見面,大家只講些「大路嘢」,提及以後星夢一哥一姐地位會動搖,周柏豪稱是外界標籤他是一哥,自己只是返工,他續道:「冇一哥、二哥、三哥!反而我想喺屋企有地位,因為而家讓咗畀個女。」

吳若希稱跟「何」有緣

講到吳若希決定續約重奪一姐寶座,吳若希:「TVB同何哲圖湊大我,如果任何一邊有需要我都會幫手。我喺屋企一直係一姐,我同姓何都幾有緣,老公、仔女、何哲圖、何麗全。」

吳若希早前有傳續約博今年升呢做一姐,對於曾志偉回巢做高層,吳若希就讚曾志偉是一位有power嘅大哥,她續道:「好有經驗嘅前輩,無論喺綜藝、電影、歌曲,佢好有經驗、涉獵過,好期待佢可以帶到我哋擦出唔同火花,細個已經認識佢,不過一直未有機會接觸到,佢返嚟都係一件開心事,特別係今日我出席呢個記者會,知道大家都返嚟,擦出火花,當然樂壇越做越好。」

講到對未來有甚麼期望,吳若希好識賣口乖落足鞋油:「我哋都係公司資產,公司好,對我們藝人嚟講係非常好嘅事,期待係加人工。」吳若希又指今年正在安排錄新歌,希望可以跟不同唱片公司的歌手合作,她笑言今日第一日復工沒帶腦:「慢慢嚟一步一步因為今日真係我第一日走返出嚟返工,都係迷迷糊糊、撞嚟撞去,個腦轉唔切,唔記得帶個腦出街,哈哈!希望快啲回復工作嘅節奏」。

講到她日前在YouTube上載影片講明恨做「一姐」,吳若希解釋未有野心:「經常俾人講要搶啲咩,老實講我真係講咗好多次,公司每一位都係對我非常好,我當公司嘅人係好似一家人,只要係家人,就共同為呢個家付出。我由18歲簽公司,結婚生仔,拎埋老人牌,我真係當公司係我嘅家庭,唔會喺個家爭啲咩!喺呢度大家都好錫我,無論係何哲圖、樂小姐、曾姐每一位都好錫我,我都好感激,爭一姐呢樣嘢係一直冇存在,我之前都拎出嚟笑,如果你哋再拎出嚟笑就好out day。」

曾志偉暗寸蔡康年

近年大騷均由「有線幫」陸浩明(6號)有份司儀,但曾志偉上任後,首個大型記者會即任人唯親,改由老將蔡康年做司儀。不過曾志偉都揸正嚟做,在記者會上暗寸司儀蔡康年不應該帶稿,曾志偉甫上台後,即指一指蔡康年,「作為一個主持就唔應該帶稿嘅」,作為金牌司儀的曾志偉更主動帶領記者會的節奏,令司儀蔡康年頗有壓力。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner