余慕蓮留醫3個月首開腔報平安 長期瞓床背脊生瘡:幾個月未食過嘢

更新時間 (HKT): 2021.02.24 17:55

現年83歲資深藝人余慕蓮(魚毛)去年11月因肺纖維化入ICU,有傳她患罕見血癌,由於細菌入肺,魚毛要插喉助呼吸,情況一度危殆,幸經醫生搶救後已好轉,早前並轉往九龍醫院醫治,今日魚毛姐接受車淑梅電話訪問報平安,魚毛姐聲綫沙啞,她指已拔喉,但未能進食,長期瞓床令背脊都損了,期望能快些出院。

留醫3個多月的魚毛姐,她在電話中指因已拔除喉管,可以傾電話:「係呀,幫我拔咗條喉,我幾個月冇講嘢,拔咗三、四日,但唔可以講咁耐,唔夠氣。」車淑梅指很多人掛念她,問魚毛姐有甚麼想同粉絲講?魚毛姐坦言:「我希望早啲可以食嘢,因為我而家係飲緊流質,希望我可以食嘢,我有力先至可以起得身,我而家仲係瞓喺張床度,大小便都要用片,醫生畀我講下電話好開心,打咗畀十幾個人。」

問到好返最想吃甚麼?魚毛姐嘆氣:「唉,乜都想食,幾個月都未食過嘢,同房嗰啲又早餐午飯晚飯,我唔食得,醫生話要等營養師,要照X光,睇我識唔識吞嘢,如果唔識吞呢,就驚住鯁親。」雖然聲綫沙啞,但魚毛姐精神不錯,她說:「我有做物理治療,但唔知幾時出院,唔敢講,要睇情況,食得嘢先至有力起身,長期瞓床背脊都損咗。」最後,魚毛姐多謝大家關心,「希望快啲出院,拜拜!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner