鄭佩佩榮升外婆好興奮 
原子鏸誕混血B 喜極而泣

更新時間 (HKT): 2021.02.24 02:00
■原子鏸與摩洛哥籍老公Mehdi上周二添丁,她表示BB提早報到,最初也感到擔心。互聯網圖片

現年42歲的1999年香港小姐亞軍原子鏸,跟摩洛哥籍老公Mehdi El Ajimi去年9月宣佈懷孕,預產期原定為下月,不過原子鏸昨早在Ig公佈於上周二年初五在嘉諾撒醫院順產誕下男B。原子鏸分享兩張BB相,混血BB有超深雙眼皮,眼仔睩睩十分可愛。原子鏸以英語表示自己原定在月中到醫院做產檢,當時懷孕接近38周,但結果BB卻在當天出世。原子鏸透露BB英文名叫Matys El Ajimi,重2.27kg(約5磅),她寫道:「言語無法表達我有多麼愛我的美麗男嬰。」

最初胎位不正

原子鏸昨日接受《蘋果》訪問,表示上周二到診所做產檢,由於在產檢時出現宮縮情況,要即刻入醫院。BB較預產期提早出世,新手媽媽原子鏸最初十分擔心:「咁梗係有少少擔心啦,BB咁細個,不過出世幾日後,我開始多咗信心,餵奶亦冇咁驚。」原子鏸透露最初醫生告知BB胎位不正,背脊一直對住她,要等轉身才可以自然分娩,好彩BB最後有轉身,可以順產出世:「覺得自己好lucky,因為我出世嗰陣都係順產。」BB出世後,原子鏸更和老公都喜極而泣。

越大越似爸爸

原子鏸又指BB越大越似爸爸:「BB初出世都有啲似中國人樣,但越大越似爸爸,眼好大隻,鼻都好高。我哋都好愛佢,每一日望住BB都感到難以置信。」問到婆婆鄭佩佩抱孫的反應時,原子鏸笑言:「佢好excited,我入院一個鐘,佢同Jennifer(其胞姊原和珍)就不斷message我老公,問BB出嚟未!」不過由於疫情關係,身處美國的鄭佩佩未能第一時間回港探望孫仔。

原子鏸為著名武打女星鄭佩佩的三女,前年與拍拖兩年多的Mehdi於深灣遊艇會舉行婚禮,原子鏸曾表示與老公是在交友app上認識,婚禮那日又指丈夫很喜歡小朋友,所以屬高齡產婦的她會努力,結果願望成真。原子鏸一向熱愛運動,不時做瑜伽及練習鋼管舞,身形健美,當年參選香港小姐更獲「完美肌膚獎」和「健康體態獎」。

娛聞樂陪你走遍全球追星,即Like「娛果」FB 專頁!
BannerBanner