林作訓練費爆羅生門 鍾培生回應拳館追數:我冇義務找呢條數

更新時間 (HKT): 2021.02.25 16:37

31歲林作因為一句抽水說話「抄我100萬」,而辣㷫百億「工廈大王」孫仔鍾培生。他豪擲100萬現金向林作挑機,要求來一場「林鍾擂台戰」,雖然拳賽仍未落實,但網上花生指數爆錶,昨日更爆出蕭定一旗下hmvod即將開拍的電影《#PTGF出租女友》,原來鍾培生是此片背後投資者,當日林作亦有份參與試鏡,蕭定一同時表示hmvod有意直播賽事,在連串的巧合下,似乎是經過悉心計劃的鋪排,質疑是宣傳技倆。

事件的花生指數今日又再飆升,翁靜晶今日凌晨在社交平台出post,分享了一條YouTube短片話:「Henry,我的好朋友。貴金屬專家,金融才俊、車手、拳師.......最近還修讀法律。論財富家境學問外表,絕不輸給任何人。他最『正』的身分,卻是功夫佬,義氣仔女一個。仗義疏財,替林作繳交學費,免得向師傅為難。Henry 的確是好漢!」

《蘋果》記者曾向拳館負責人向太了解此事,她表示不再回應這件事:「佢哋兩個而家搞到㷫恰恰,都唔想抽水,所以冇特別嘢再講。」不過有指林作到場當日的確沒有人付學費,直至Henry出片當日,拳館亦已經收到由Henry支付的學費。

拍片叫鍾培生找數

而翁靜晶口中所講的Henry,原來是金融集團老闆Henry(李俊亨),日前林作到拳館進行第一次Fight Team訓練,有傳鍾培生要向柏榮師傅負擔林作有關訓練費用,Henry獲悉事件後,有感拳館因疫情營運已經非常困難,所以決定承擔所有支出。

未想到事隔數天,Henry拍了一條「鍾培生大師兄 記得找埋條數」的短片,Henry稱鍾培生因為在多年前曾跟向師傅學拳,所以稱呼對方為師兄,言談間又欣賞對方是慈善家,又是香港電競業之父,Henry續道:「呢個大慈善家同企業家,竟然因為林作嘅一句抽水,抵唔住頸撩人上台隻揪,仲要畀一百萬上台費不特止,佢有錢玩,但係介紹林作去練拳,就冇錢畀林作,你都出得一百萬,十幾萬你都畀唔起?」

他指現時香港經濟低迷,疫情令到許多地方執笠:「向師傅就嚟死喇,你仲要揼佢心口?你唔好咁喇,你都係想林作上台俾你打餐飽啫,你畀唔起,你要玩嘅,我咪幫你畀囉!」接着他直斥鍾培生:「乜嘢叫體育精神呀?就係要挑戰自己,唔係畀你以大欺小,三句唔埋,呢個唔鍾意、嗰個睇唔順眼,就叫人上台隻揪,鍾培生大師兄,不喜勿插,你唔鍾意,唔使挑戰我喇,你去蝦啲比你弱嘅人喇,繼續打佢哋喇,尊重體育運動嘅,唔該你找返向師傅條數喇!」

反擊冇義務找數

鍾培生事後分別在翁靜晶的post以及Henry的YouTube Channel留言:「第一、 我唔係你師兄, 只在2018年4月19日唯一一次拜訪向師傅見面一次;第二、我同向師傅交情無需同大家交代;第三、林作托人搵我介紹拳館,我向委托人提供了幾個聯絡方式,並沒有再跟進;第四、我言出必行,從未出現唔找數,同時只會早咗找或找多咗;第五、你標題同內容有誤導成份,我並沒有義務為你或林作找呢條數!」

事件惹起網民討論,有網民支持鍾培生:「介紹都要你找數,真係唔知咩logic(邏輯)!我都要留意吓有冇介紹咗人餐廳食飯、睇醫生、見律師,原來介紹咁大責任」、「我同意鍾生都係幼稚同冇體育精神,但係練拳費冇話一定要幫林作畀喎。講到鍾生走佢師傅數咁,又有少少唔公道」、「無法理解,點解要介紹嗰個人俾學費?咪唔好學直接上台或者唔打囉」、「條片似抽水多囉,諗極都唔明點解要幫對家找數先叫有體育精神」。

林作稱Herny係恩人

對於Henry公開向鍾培生追數,林作今日回覆《蘋果》說:「我冇錢呀!支出龐大,向來做生意係唔用成本,咁我係窮,不嬲都認,如果唔係點會為呢一百萬出嚟,成日講財困,我去拳館同佢哋傾,呢個時候拳館有一個金融才俊成日打,又同拳館好熟,佢仗義挺身而出話幫我搞掂,最緊要係打好佢,所以我好感動,接受咗!唔畀錢係正確,嗰個人叫Herny Li,係我嘅救命恩人,同佢成為好friend嘅兄弟。如果冇人畀錢、食霸王餐就唔做,冇理由,咁對拳館係唔公平。」

拳館的負責人日前接受傳媒訪問,曾經表示團隊願意培訓林作,初步估計訓練費用超過10萬元,問到當初鍾培生有否表明幫手交學費?林作說:「有暗示有人會幫我度,佢又話傾咗先,咁當時我都係傾咗先,一直係好開放嘅態度,如果你話一日收50蚊都要畀,去到先知原來收咁貴,唔係話唔應該,呢個時候可能有意支持我,真係好感動,我要講冇人係蝕底咗,拳館有錢收,我又有拳學,以我所知Herny兄做咗件好事,應該要畀人知,佢係有心幫手,我係好感動。」

任何一方冇蝕底

對於鍾培生未肯為對手支付訓練費用,反而由Henry聲稱負擔所有費用支出,林作坦言:「Henry可能鍾生有啲睇法,呢個都正常,佢哋嗰啲富豪公子哥兒之間嘅恩怨,最緊要我係好open,嗰陣同佢哋傾,可以搵到贊助作合作做宣傳,大家夾啫,都唔想任何一方蝕底,最緊要大家都有好處,呢個係商業社會嚟,但係我嘅原則係嚟收錢,希望可以拎到一百萬,而唔係嚟揼本。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner