田蕊妮加入電影業激辯撐游學修 諷舊時代方程式:可能係滅亡主因

更新時間 (HKT): 2021.02.25 19:53

資深傳媒人蕭若元與新一代演員游學修日前在新興的社交應用程式Clubhouse中,討論「香港電影已死」及「香港電影回復80年代光輝機率是零」,兩人話題越戰越激烈,其後戰況延伸至各自的YouTube頻道上,蕭若元稱「香港電影工業無前途」,直言行業復蘇到1980年代的光輝機會是零,游學修隨即拍片回應,批評上一輩恃住幸運而向後輩潑冷水。

田蕊妮今日為張寶華的YouTube節目做嘉賓,對於蕭若元「機會是零」的言論,她說:「或者我用一個觀眾同演員嘅角度去睇,一個科技嘅發展,確實係令到每一個觀眾接收娛樂嘅習慣性係唔同咗,而家係方便,只要想睇啲乜嘢,一個電話,已經可以搵到好多娛樂。」阿田認為現時處於一充滿變化的年代,與已往有很大分別:「以前嗰個年代,佢哋餵你食咩就食咩,而家係一個變化年代,你唔知嗰樣嘢會變成點。」

舊路未必需要跟

蕭若元覺得舊時代輝煌,但阿田覺得舊法則不是絕對,續說:「我唔覺得人係要循住舊規則去建立而家嘅嘢,當然你可以話係一個參考,但係咪需要跟住一條舊嘅路去做呢?」

在演員角度,阿田在年輕一代的演員及導演中看到熱誠:「佢哋唔會乜嘢都話死咗就唔做,喺我嘅角度都係一樣,乜嘢都話死咗唔做,咁唔使做人喇?而家都仲有一啲人喺呢個行業,大家好熱心,亦都好有理想,想去開創自己新嘅路,又或者係大家一齊行嘅路。」她又稱當日開「喱騷」這個apps,只不過是希望行出一條新的路,並非要取代任何一件事。

最後阿田更指以往的成功方程式不是絕對,她說:「人就梗係最想懶,乜嘢係成功,就梗係跟住嗰條方程式去做,但係我覺得而家個世代唔係,已經唔再係有一條方程式跟住去做,甚至嗰條方程式,好可能係令到嗰樣嘢滅亡嘅主要原因。」

阿田指現時新一代人破釜沈舟,嘗試找出路,她又多謝蕭若元:「如果唔係有多得蕭生呢啲前輩,佢哋咁樣去衝擊我哋,衝擊我哋嘅思維,話畀你聽你哋嘅機會係等於零,你嗰股勁係未必有咁勁,有陣時人都需要有少少呢啲鞭策,嗰種力度會令大家更加醒同更加強。」

受到一班後生的圍攻

蕭若元日前在YouTube頻道重提當日在Clubhouse講完行業回復光輝機會是零後,受到一班後生的圍攻:「我總括一下年輕人意見,佢哋係好有熱誠,我哋係為理想做自己嘢,你哋啲『老而不』就懷緬過去,我哋唔係想要你哋啲嘢,我哋想走自己嘅路,而未來係不可知。佢哋覺得我係喺度淋冷水,因為佢哋一股熱誠喺度做嘢。」

蕭若元又提到自己作為一個評論員,不會盲目地講鼓勵的說話,年輕人拍短片在網上發佈,是「有些創意」,不過這些小型製作未能撐起工業,電影製作涉及各種專門技術,導演必須具備領袖才能,管理數以百計組員;兩、三個人拍 YouTube 影片只是「家家酒」(煮飯仔),如果拍片不求賺錢、成名、公眾和行業認同,這不過只是「自娛」,所以希望年輕人先搞清楚想要甚麼。

無人有資格去定義

其後游學修拍片回應,他認同無辦法重複80、90年代電影業的輝煌,目前YouTube 影片製作方法是「家家酒」(煮飯仔),但並不等於會一直停留在這階段:「因為世界已經改變,時局和時機都不同,但有冇可能,行返一個有未來的 future 出嚟?」他又直斥蕭若元向年輕人講機會率等於零,等於叫他們去死:「點解一定要用1980年代工業模式才可以變成下一個天王巨星?點解仲要執着金唔金像獎、奧唔奧斯卡?我可能錯,但我不會斷言那是不可能。我覺得冇人有資格去定義機會率等於零。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner