疫市出道靠《造星》學識要有被討厭的勇氣 阿左KiKi最想做自己:我係藝人,唔係偽人

更新時間 (HKT): 2021.02.25 00:30

新晉藝人陳樂頤(阿左)與張凱娸(Kiki)在過去半年間人氣急升,全賴參加了去年ViuTV的真人騷《全民造星III》。她們屬同一公司,是Angelababy的小師妹,勢估唔到,兩個初出道的新人,在疫情夾擊下,依然贏得人氣與工作機會,現時二人也獲得片約,密密有工開。除了挑戰自己,她們更上了入生重要一課,學懂「要有被討厭的勇氣」。

前年於演藝學院畢業的Kiki剛出道就碰上社會運動,再加上世紀疫情,原本打定輸數的她遇上了《二月廿九》的好劇本,去年更獲鼓勵參加《造星III》,Kiki說:「《二月廿九》呢個機會真係幫咗我好多,之前真係好似三失青年咁㗎。其實係公司鼓勵我參加《造星III》,我自己好冇信心嘅,完咗之後發現可以挑戰到自己,我一定唔係勁,但原來都郁到,亦可以唱到歌,個人冇咁自卑,同埋學到點樣做人,學會堅強面對,喺是非之地都保持真我,我係一個藝人,而唔係一個虛偽嘅人。」

雖然比賽沒有名次,但Kiki卻贏了人氣,贏了經驗,更贏到真愛。她與早已認識的KLau因《造星》日久生情,正在熱戀中的Kiki甜絲絲說:「我哋認識都係緣份,其實喺《對號入座》之後透過一班兄弟我哋已經認識,到《造星III》喺短時間內長期對住,日對夜對,發現佢係一個好好嘅男仔,雖然佢嘅外表俾人抨擊係好『Fxxk Boy』,但我覺得男仔應該係咁,外表好『Fxxk Boy』,內心係暖男,好照顧人,其實KLau係一個好溫柔嘅男仔。」

Kiki走女神路線,相反,阿左原來是一個充滿喜感的女孩。阿左無懼形象崩壞,只有22歲的她精力充沛,愛整蠱做怪。去年城大畢業的阿左,修讀創意媒體,音樂是她的強項,擁演奏級鋼琴資歷,不過卻被老師點名指她有喜劇天分:「其實我上年畢業已經諗住搵工,我知道好唔容易,咁啱有朋友叫我一齊參加《造星III》,完咗之後又多咗拍攝機會,好順其自然咁就入咗行。真係好好彩,疫情下一路都好忙,雖然收入唔可以話OK,如果真係冇工作都會做兼職養自己。《造星III》後我發現咗自己喺表演上嘅可能性係多咗,除咗唱歌,對演戲都好有興趣,最好笑就係有老師喺我一個好正經嘅戲劇表演後,話我係有喜感。我都想帶歡樂畀大家,其實我好想好似王菀之咁,可以有個人特色嘅音樂,佢個風格好特別,同演戲係好極致,好搞笑。」

直率的個性卻令阿左經常得罪人,在《造星》時她一句「好開心可以同dancer跳舞」,令陳葦璇嬲爆並指她不尊重人,阿左憶起舊事顯得尷尬:「我已經得罪咗人,係需要學習嘅,無論面對朋友、工作上夥伴,都要學習點樣同人溝通。你自己接受唔代表人哋接受。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner