余子明難忘被罵走狗報記者 由港督府喪跑落花園道逃避左派追打

更新時間 (HKT): 2021.02.26 00:00

余子明1976年加入無綫做《歡樂今宵》,入行前做過幾年歌廳歌手,也做過《南華晚報》和《天天日報》記者。子明哥沒有高學歷,小學畢業後跟了壞朋友,當上逃學威龍,終日流離浪蕩,無所事事,17歲經舊同學介紹到《夜香港》報館做校對,3個幾月後過檔姊夫任總編輯的《南華晚報》,因為是潮州人識講「架己冷」,結果偶然機會下給他當上記者。

子明哥日前接受《蘋果》專訪時話當年:「有日有架巴士唔記得撞死定撞親個細路,報館有個新聞記者去,突然間佢打電話返嚟話唔掂,話啲人好牛精,成日炒蝦拆蟹講打,佢又唔識講,又驚又唔知點做,叫搵第個去,主任問邊個接呢單嘢,我話我去,我識講潮州話,柴灣嗰啲全部潮州佬,我去到實同佢哋講得掂,主任諗住呢啲新聞好輕擎,咁就畀咗個機會我。我一去,第一樣嘢梗係講潮州話『架己冷』,同埋我醒目,凡係乜嘢事,梗係向傷者講好說話。」子明哥講起當年如何自告奮勇諗計成功採訪,一臉自豪。

大半年後報館擴張,子明哥正式做記者跑港聞,甚麼大新聞他都經歷過,最深刻被兩個曾經稱兄道弟的左報行家出賣。子明哥咬牙切齒極氣憤的說:「有日我早咗上港督府,上到去見唔到右邊行家(指右報),我醒目,避開啲先,唔好畀人容易見到,突然佢兩個其中一個見到我大叫:『打走狗報記者!』一聲走狗報記者,嘩!幾多人(衝向我)呀,成條花園道滿晒咁滯,不過我嗰時後生,一條氣由花園道走落嚟……幾牙煙呀!」

還有1964年英國殿堂級樂隊Beatles訪港,子明哥也有份到啟德機場採訪,還幾乎跟蕭芳芳丈夫張正甫嘈交。「張正甫英國讀完書返嚟做記者,我幾乎同佢霎氣,因為嗰時披頭四嚟香港,佢又影又剩,你知我身材同佢比差得遠嘛,佢成日擋住我,嬲到我呢。」

從小愛唱歌的子明哥,1968年參加業餘歌唱比賽,憑《曼莉》一曲攞到冠軍後,獲北角夜總會「銷金窩」邀轉行做駐場歌手,其後登台跑碼頭,星馬泰、越南、汶萊、法國都有他足迹。70年代子明哥與台灣藝人錢蓉蓉在香港登台演歌劇,結果獲無綫中人賞識邀請加入《歡樂今宵》。

講到子明哥另一半,過去不少人都以為馮素波是他老婆,講起這個美麗的誤會,子明哥笑說:「呢樣好好笑,搞到請飲時好多記者集體鬧我,話我老婆都搞錯,馮素波吖嘛,你整咗馮素雲(請帖),我話我老婆係馮素雲,佢細妹囉!個個都話馮素波係我老婆,點解會有啲咁嘅事發生?因為馮素波同我同場唱胡社生行海天歌劇院,素波唱完要去金漢夜總會,我哋咪一收工行去嗰度囉,我哋男仔梗係同佢挽住個化妝箱啦,個個都見到我幫佢挽化妝箱,以為我追佢,到而家都仲有人係咁喎。」

採訪:戴彩煥

場地:阿肥火鍋

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner