湯怡肉麻愛的宣言閃爆婚禮 麥秋成嘗試做多仔公

更新時間 (HKT): 2021.02.26 19:11

湯怡(Kathy)和麥秋成今日於陽明山莊會所舉行婚禮及簽紙儀式,設宴用上5個廳,宴請80位賓客,完成儀式後,二人接受在場傳媒訪問,Kathy換上晚裝、戴着2卡訂婚戒指及婚戒現身,兩人更脫下口罩咀嘴晒恩愛。

現時懷胎4個的Kathy表示預產期在7月,大日子仍然替BB性別保密,她說:「等大家估吓,遲啲先開估,我哋仔女都冇所謂,家人話我個肚比正常大,自己好想親自湊BB,秋成都會幫手湊。」Kathy表示預計產後修身便可復工。談到想生多少個小朋友,麥秋成先說「睇天意」,其後又笑言:「生5、6個。」Kathy指爸爸為她戴上龍鳳鈪時轉了很多個圈,寓意她生很多個,麥秋成即笑說要努力試。

兩人透露在婚禮中,向父母說出深情對話,忍不住感動流淚,麥秋成說:「家人都留咗家傳之寶畀我哋,爸爸留咗婆婆傳畀佢嘅戒指,媽咪喺我18歲嗰年買定條金鏈畀我。」二人又分享愛的宣言,Kathy肉麻說:「開心佢出現喺我人生,我好似每日都發緊夢,好夢幻,佢好有耐性,好包容我。」麥秋成對Kathy說:「我愛你一生一世。」

今次婚禮未有邀請大多數圈中朋友,麥秋成說:「我淨係請咗老師,打拼多年嘅dancers都冇請,叫大家忍一忍,暫時年尾先擺酒。」Kathy希望產後修身一次過搞婚宴,對於IG的性感婚紗照,她說:「係我入行以嚟最性感一次。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner