不忿新一代被批拍網片如玩煮飯仔 
游學修寸蕭若元 老人家視野有限

更新時間 (HKT): 2021.02.26 02:00
■游學修反駁蕭若元的看法:「咁即係叫年輕人去死?」互聯網圖片

知名傳媒人蕭若元日前與新晉演員游學修,在社交媒體Clubhouse討論「香港電影已死」以及「香港電影回復80年代光輝機率是零」等話題,兩代電影人意見分歧展開激烈討論,及後他們更在Youtube自家頻道上出片繼續爭辯,火藥味十足。

「冇人可下判斷」

蕭若元在討論中批評香港自80年代後影圈幕前幕後已再沒有人才出現,接着又批評時下年輕人拍攝的網片、Youtube片是「小兒科」,如果想以這些「小學雞」影片來重拾當年影圈的光輝,機率是零,他更以評論員口吻批評年輕人拍片:「其志可嘉,其愚可憫。」力指他們潛意識希望有日會變成周潤發或周星馳。游學修隨即拍片回應前輩睇法,強調時代及世界已改變不少,香港電影業仍有希望,未來出路甚至可能就是被蕭若元形容如「小朋友煮飯仔」的網片,他更指出網片甚至將來可能在大銀幕上播放。

游學修批評蕭若元是老人家視野有限,反問對方:「點解唔可以用新嘅方式成就下一個人?雖然嗰個唔係周星馳、周潤發,但點解就唔可以係新嘅天王巨星?點解下一個天王巨星一定要用返80年代工業模式先能做到?點解仍覺得拍片嘅人一定會執着於金像獎、奧斯卡?」他最激動的是蕭若元指年輕人「機會是零」,他覺得冇人可以如此下判斷:「咁即係叫年輕人去死,咁我真係唔知你每日喺網上發表咁多嘢做乜!」

阿澤撐電影有救

杜汶澤和太太田蕊妮亦有留意兩人爭辯,阿澤日前在fb留言:「游學修真係越嚟越靚仔,尤其係俾燈神加持咗之後,連額頭啲黑氣都冇埋⋯⋯呢次香港電影有救喇!感恩這地球有燈,讓我們的下一代看到前路!年輕電影人,加油呀。」而阿田昨日在YouTube接受張寶華訪問時亦說:「如果唔係多得蕭生呢啲前輩,佢哋咁樣去衝擊我哋,你嗰股勁未必有咁勁,有時人都需要少少呢啲鞭策。」除拍電影,游學修近年開設的YouTube頻道「試當真」吸引了不少年輕人追捧,已有逾17萬訂閱,其中一條《狂舞派2》短片上載六日已有逾37萬點擊。