余子明效力無綫43年 拍劇受傷腦出血:做到幾乎連條命都冇咗

更新時間 (HKT): 2021.02.26 00:00

現年77歲的余子明曾經是無綫大忙人,星期一至五晚晚做《歡樂今宵》(EYT),與夏雨主持的趣劇《大眼雞與單吊西》尤為受歡迎,觀眾都愛稱子明哥做「大眼雞」。那些年,子明哥既要做《EYT》又要拍劇,《封神榜》的姜子牙、《季節》演媽打鄧碧雲堂妹夫阿富,還有《尋秦記》 到去年播映的《踩過界II》,子明哥都有份演出,加入無綫43年閒閒地演出超過200部劇集。可惜這位昔日大忙人,過去幾年慘變大閒人,加上無綫要他改簽一年一騷,子明哥去年決定離開不再續約。

「無謂啦,我簽咗都冇嘢畀我做。我要你嗰一萬幾千做乜?同我講一年一個騷,我唔使食飯呀?佢哋(指TVB)話梗係有嘢畀我做,我話我坐咗成年都冇乜嘢做,所以我咪唔簽,畀一個騷養我一年、綁住我一年呀?」中氣十足的子明哥日前接受《蘋果》專訪時親揭離開大台原因。

子明哥是潮州人,講說話特別有火,記者跟他講起劉江、雪妮一個個前輩藝人去年跟他一樣離開無綫,子明沒好氣的說:「梗係啦,人哋雖然唔志在錢,面子問題吖嘛!同埋自己感覺上唔舒服,我又唔係唔做得,你要靠social,我做嚟做乜啫?我做咗40幾年,冇甩漏過,做足畀你睇,仲有喎,喺你度做,做到幾乎連條命都冇咗,我都冇怨過你。」

話口未完子明哥即除帽展示頭殼疤痕,清楚見到有兩個凹位。

「做到幾乎死咁滯,當然我老婆講呢啲係我自己唔小心,而家又冇事咪算囉。」

意外追溯至2000年,子明哥返大陸拍《尋秦記》,與郭羨妮先後登上馬車,子明哥一上車,整部車便突然塌下來,撞到子明哥腦出血。

「當時我個頭好似裂咗,痛到我唔識嗌。」因為戴了頭套,子明哥不知道自己有沒有流血,自覺還頂得住,為免影響拍攝進度,他就頂硬上繼續開工,直至收工後有嘔吐感覺,還以為是同劇林峯、宣萱患感冒傳染自己,就隨便吃止痛藥算數;如是者一頭痛便食止痛藥,幾日後返到香港,他還跟李海生到余慕蓮家打麻雀,打了幾粒鐘又再頭痛才回家休息。

「我醒咗之後原來喺醫院,大仔坐我隔籬。」原來當晚返家後,大仔知道子明哥身體不適,即送父親到養和醫院求醫,但所有過程子明哥全部斷晒片。

子明哥說:「嗰日門診醫生睇睇吓覺得唔對路,同我個仔話:『你爸爸個腦有問題,即刻搵腦科醫生睇睇。』照咗X光後,醫生話我成個腦歪咗,入邊開始流血。」結果醫生在子明哥頭頂鑽了兩個窿做手術,手術費連兩星期住院費埋單20多萬。

問無綫可有為他買保險?子明哥說:「有,個仔一睇(保單),話最平最賤呢間,無綫同我哋買嗰間,計起上嚟10幾20萬(賠償),無綫津貼下仲差4萬,無綫同我講:『子明哥,你唔好令我難做吖,8萬公司出咗4萬,嗰4萬當你OK啦。』我話:『得,如果呢4萬令你難做,何必呢?4萬我畀得起。我咪當輸咗去囉。』」

對於效力40多年的無綫,子明哥多次強調自己沒有任何不滿,他解釋:「後生成日呻,話折磨,我覺得點會!你要付出,佢要收穫,張合約係雙方面,你認為好,認為OK先簽,簽咗就唔好怨。有好多後生或者老過我嘅,話無綫點唔好,老實講,我感受OK啦,我供書教學3個仔女,讀晒大學,都係佢畀錢我。」

訪問期間,子明哥多番提到自己今日一切都是「上天安排」,他有點不好意思的笑說:「我個樣(失笑)……我成日好感恩,好多謝上天,書又唔係讀得多,我出嚟做嘢又舒舒服服,唱唱吓冇歌唱(登台)諗住死喇,突然又有呢份工做,係好開心。」

問子明哥可有興趣出山拍劇?他表示:「暫時我決定咗退休,但若果有其他嘢做,有錢嘅同啱我嘅,我都做㗎。」話口未完子明哥在記者面前耍功夫,笑住話:「我仲得!」

採訪:戴彩煥

場地:阿肥火鍋

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner