23歲鄧月平拎全副身家自組工作室:後生唔搏幾時搏

更新時間 (HKT): 2021.03.01 13:01

現年23歲的鄧月平(Larine)擁有F級的火辣身材,剛剛跟前公司完約,Larine年紀輕輕,已在逆市下決心闖一闖自組工作室,她說:「好多朋友覺得我冒險,我認為趁年輕,有夢想目標就應該去嘗試,激起我喺呢個時勢做咁大嘅新嘗試。疫情期間,雖然工作量減少,但多咗時間學唱歌、排舞,認清自己好鍾意唱歌,想學習唱作,希望日後有機會參與更多創作部分。」問到自組工作室,有否感到壓力?Larine說:「雖然開設工作室唔係咩大數目,但真係成副身家拎出嚟搏一鋪。自己性格喜歡自由,希望創作空間自由度大啲,帶到唔同面貌畀觀眾,放下以往包袱做自己感趣嘅類型,幸好遇到志同道合經理人同團隊。下一首歌就想挑戰唱快歌,既然心中都已經有明確目標,咁不如就大膽試吓,後生唔搏幾時搏。」

Larine稱仍是單身,但早前就邀請了男神游學修上她的網上頻道做節目,親手炮製湯圓,讓她重拾戀愛的感覺:「我最近推出咗一首新歌《U》,原本邀請咗幾位朋友做MV男主角,但佢哋都係圈中炙手可熱嘅男神,所以未有檔期拍攝。其中一個就係游學修,不過佢都好有義氣,夾唔到時間拍MV,但知我單身咗好耐,都上咗我個節目。」

Larine相隔兩年推出新歌,今次有參與填詞:「呢首歌想表達每個人心裏面都有一個無可取代嘅人,思念係一種幸福,歌詞內容係自己過往經歷有感而發嘅,希望有相同經驗嘅朋友得到共鳴,亦都鼓勵大家勇敢表白。」今次MV製作非常花心思,除了搭景拍攝足足兩日兩夜,Larine更以8個不同造型示人,部分服飾更遠從羅馬運到香港,她說:「我最鍾意愛麗絲造型,當初同導演提過想有童話故事元素,拍片團隊好熱血,為我通宵搭咗個咁精緻嘅場景。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner