吳孟達病逝丨 艾威探望後透露達哥「冇晒反應」 日前已插喉及注射嗎啡

更新時間 (HKT): 2021.02.27 16:46

吳孟達肝癌擴散,今日情況急轉直下,中午時份已進入彌留狀態,有逾半百記者在場守候。與達哥相識多年好友陸續抵達沙田仁安醫院見他最後一面,包括駱應鈞、田啟文等,最早到醫院的艾威,逗留約一小時,約下午2時許離開,他神情肅穆說:「因為佢啲屋企人同摯友親朋個個做晒核酸,我哋只可以上去見一陣,唔可以逗留,所以見完佢都係返屋企先。(佢情況係點?)其實情況……大家都知,唔係太樂觀……(即係有心理準備?)係。」

艾威表示有位好好的朋友一路陪伴達哥,自己也是收到達哥方面通知才趕到醫院探訪,他續說:「由佢一個月前喺澳門留醫嗰陣時開始,一路留醫陪住,大約一個月前到啦,佢微信講『保持聯絡,你搵唔到我㗎喇』。」艾威又指,其實達哥之前已經做過一次化療:「佢話第一次打贏咗,跟住唞唞再做第二次,咁我喺呢段期間我每一日都發咗加油嘅公仔畀佢啦,都唔想佢咁辛苦,又要覆短訊各樣,唯一可以做到嘅嘢就係幫佢打氣。」

另外,艾威證實達哥已插喉,而嗎啡已在日前注射,現時打了強心藥。至於是否昏迷,艾威形容:「瞓着覺咁啦,又不至於冇晒反應,但又唔係聽到嘢咁啦,可能瞓着咗」。而達哥先後有三段情,育有合共5子女,艾威指達哥的太太及兒子都有陪伴在側,弟妹亦有在場,但未見達哥母親。艾威最後祝願達哥可以「大步檻過」,他自覺沒有甚麼可幫得上忙,但不忘讚達哥好人:「佢之前太好人,所以好多好朋友都撐佢!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner