顏卓靈BabyJohn藉《狂舞派3》控訴地產霸權 Rapper Heyo︰佢哋放租好過打劫

更新時間 (HKT): 2021.02.27 00:30

創作內容同社會文化、人和事息息相關,去年電影《狂舞派3》主題曲《歡迎嚟到呢座城市》入圍台灣金馬獎最佳原創電影歌曲,歌詞夭心夭肺,諸如「我哋出身龍城,並非一事冇成,我哋只係想搵到共存嘅途徑,我哋曾經都相信公平」、「全城來肩並肩,人連人手挽手,齊祈求快樂到永久」,更到肉的是「一座城市,只有由佢嘅人民定義,呢啲係我哋嘅事,係大家嘅事,以我哋嘅名字,嚟伸張正義,去守住呢個城市,以我哋嘅名義」。有網民聽完歌,紛紛猜測演員及主題曲填詞人之一的Rapper Heyo(霍嘉豪),憑歌寄意反映前年香港社運實況及港人抗爭的心情。

「樓奴」窒礙創作

早前Heyo、顏卓靈同蔡瀚億(BabyJohn)為《狂舞派3》宣傳,在觀塘工廈一單位接受訪問。Heyo講到歌詞被網民追捧,他解釋話歌詞是電影的濃縮,早在社會運動之前已經寫好,不過他補充:「其實類似問題,一早就存在,大家聽到有共鳴,係因為呢啲根本問題一直未解決。」

問題未解決,作為時下香港人,同「樓」的關係密切。入行多時的顏卓靈已擁有蝸居,她覺得有屬於自己的地方,感覺較踏實︰「會覺得好secure,無論點樣都好,發生乜嘢事都可以返去。」但從藝術工作者的角度出發,無疑是一種負擔,她舉例說︰「如果你有一層樓會唔會影響你追夢呢?原來我有工作A同工作B,工作A我比較喜歡,但係工作B會較多錢,如果有供樓呢個考慮,會影響到一個人最純粹嘅追夢決定。」

Heyo控訴地產商冇道德

Heyo形容在座的都是表演行業工作者,就如戲中的一班藝術工作者,都會遇到相同問題,他說︰「好自然你會去租地方開工,就好似我咁會有一個工作嘅studio,當你見到份租金,就知道班地產商有幾過份,其實坦白講,某程度上是影響緊一個人去創造事業。已經唔係講緊夢唔夢(想),係一個好實際問題。地產(商)好冇道德,太過冇道德,有時啲位去得太過份,好過打劫,放租好過打劫。」Heyo即場發揮rapper本色,以「地產」為題freestyle rap起上來:「第一張紙,佢寫住『地產』希望我rap嘅時候唔會老尷,因為我哋每日都要喺度交租,我哋不停做不停步,但係為咗啲乜,都係想可能建構呢一個Heyo同埋佢嘅studio。」

BabyJohn拍照留回憶

BabyJohn形容香港跟其他國家一樣,是一個既得利益者主宰的地方,他說香港的景觀時刻都在變︰「修平導演同我講,試過星期六睇景,到星期一已經不一樣。」BabyJohn指控訴是消極手法,他會以較積極的方法去應對地產霸權,他說︰「啱啱自組公司時做咗一件事,去咗香港唔同地方,有感受嘅就影相。去嘅地方唔係尖沙嘴鐘樓呢類一般遊客會去嘅,其中一個地方係深水埗一啲唐樓,你唔知佢幾時會拆,但畀咗好多回憶香港人。」他說事後在網上發佈,講到唐樓其中一項特點是沒有電梯,居民動輒要行數十級樓梯返家;住唐樓可以在天台曬衫等,文章即時引來很多共鳴,好多人憶述兒時經歷,在既定遊戲規則下,香港人其實仍可分享回憶。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner