圈中債主成籮 至少欠40萬 
張致恒被貼街招追數 搬屋改電話疑走佬

更新時間 (HKT): 2021.02.27 02:00

張致恒(Steven)上月被揭多次問身邊朋友借錢解財困,包括向關智斌(Kenny)、林盛斌(阿Bob)和馮鎵瀠(Naomi)等借下至少40萬元,更被Naomi怒斥有錢租住村屋、請外傭等卻沒錢還債。不過,日前有街坊發現他的元朗寓所外,貼滿追數街招,並估計Steven上個月已舉家搬走。《蘋果》昨日走訪上址,確實不見Steven蹤影,而他的電話亦暫停使用,疑似因財困已走佬。

現年36歲的張致恒上月被揭多次問身邊朋友借錢,包括欠下昔日好友關智斌及鄭希怡(Yumiko)各10萬元,林盛斌、張彥博和馮鎵瀠等各幾萬元,還有部份幕後人員各幾千元,保守估計至少欠下40萬街數,Naomi更公開怒斥Steven有錢請外傭、買電器沒錢還債。當時Steven曾承諾會盡力工作還錢,可是,有元朗街坊日前發現Steven位於元朗村屋寓所外,貼滿追還錢的街招,街招上除有Steven一家四口照,上面更寫上「老千」和「還錢」等字句,街坊亦發現Steven寓所的信箱塞滿追數信件和紙張,似乎他除問圈中朋友借錢外,可能還欠下銀行或財務公司錢,街坊並稱已有一段時間沒有見Steven一家出入上址,估計上個月已舉家搬走。《蘋果》昨日走訪上址,見信箱已被清空,Steven的電話亦已經暫停使用,其太太雯雯的Ig更完全清空,被疑避債。

Naomi聞借額巨大好驚訝

上月尾,跟Steven相識20年的Naomi鬧爆他欠債不還,後來發現有多位藝人及幕後都是受害者。昨日Naomi接受《蘋果》訪問,她透露上月報道曝光後,Steven曾主動聯絡道歉,並承諾一星期內還錢,結果還是無蹤影,她說:「新年都過埋,但都係收唔到。冇再追,因為知道唔係得我一個,數量好驚訝,咁借法,我都應該收唔番。」她直言不會原諒Steven:「佢講嘢好無稽,話冇工返,之前洗碗,但餐廳都執埋,啲嘢用積分換返嚟,好簡單啫,啲嘢唔消費何來有積分,佢話係電話費積分,但我屋企有五個電話號碼,我哋同一個family,都冇積分去換電器。」

會否戥Steven的妻兒可憐?Naomi不屑說:「一啲都唔慘!佢有得去冒險樂園玩,有得去BB展買啲好貴嘅BB用品,又有得養狗養雀,有工人,全家人係用緊其他人嘅錢,去維持自己好好嘅生活,佢哋好幸福,我都想做佢。」她憶起Steven解釋去冒險樂園玩,越講越㷫:「佢答我『100蚊之嘛』,你有100蚊畀小朋友揼落鹹水海玩,但你唔用嚟還錢畀人?」第四波疫情稍緩,經營美容店的Naomi雖然已經復工,但她指客人仍未有信心再消費。

張彥博上月廣州遇Steven

阿Bob指同樣是對上一次新聞出街後收到Steven電話道歉:「佢仲話過咗年之後可能會返內地做嘢,我叫佢爭氣,努力工作,重過新生活,盡快清還所有債務,之後就冇再聯絡。每個人都會有唔順境,生活困難嘅時候,喺我嘅角度,如果我仲有能力可以幫一幫忙,希望有一日佢重新振作。」

張彥博曾在Steven落難時收留對方五年,上月他在廣州工作時有見過Steven,對於Steven疑走佬避債,他語重心長說:「我沒有奢求甚麼,我自己也有負擔,家人都沒有工作,我也需要照顧他們,只好更努力了,人人都難捱,最緊要唔好影響到其他人,自強吧!」Steven的內地經理人Ming,表示上個月Steven有返內地工作,他說:「佢𠵱家應該喺香港,但我唔係太清楚,我係負責佢電影嘅工作,另外嘅工作佢簽咗畀另一間公司。」問到Steven被貼街招追數一事,Ming表示與Steven是工作上合作,對方工作態度沒有問題,亦沒有問他借過錢,將來有合適工作都會找他。

娛聞樂陪你走遍全球追星,即Like「娛果」FB 專頁!
BannerBanner